प्रधानमन्त्री केपी शर्मा ओलीले नेपालको निसान छाप परिवर्तन सम्बन्धि संविधान संशोधनका लागि निशर्त सहमतिमा आउन सबै दलहरुलाई आग्रह गरेका छन् ।
मधेष केन्द्रित दलहरुले आफूहरुका माग समेत समेटेर संविधान संशोधन गर्नुपर्ने आवाज उठाएपछि प्रधानमन्त्रीले निशान छाप परिवर्तनको यो प्रस्तावमा बीनाशर्त सहमतीमा आउन आग्रह गरेका हुन् ।
सरकारले लिम्पियाधुरा, कालापानी र लिपुलेक समेटेर जारी गरेको नेपालको नयाँ नक्सा अनुरुप नेपालको निशान छाप परिवर्तन गर्ने संविधान संशोधनको विधेयक गत शुक्रबार संसदमा दर्ता गराएको थियो ।
प्रधानमन्त्री ओलीले मंगलबार साँझ बालुवाटारमा बोलाएको सर्वदलीय बैठकमा जनता समाजवादी पार्टीका नेताहरुले यही समयमा आफूहरुले उठाउँदै आएका मागहरुसमेत समेटेर संविधान संशोधन गर्न आग्रह गरेका थिए ।
जवाफमा प्रधानमन्त्री ओलीले संविधान संशोधनका अन्य विषयमा छलफलमार्फत सहमती कायम गरेर अघि बढ्नु पर्ने बताए । उनले निशान छापमा नक्सा परिवर्तनको विषय तत्काल निर्णय गर्र्नुपर्ने भएकाले सर्वसम्मतीमा आउन दलहरुलाई आग्रह गरेको प्रधानमन्त्रीका प्रेस सल्लाहकार सुर्य थापाले जानकारी दिए ।
प्रधानमन्त्री ओलीले अहिले संविधान संशोधनको विषय देशको भौगोलिक अखण्डता, सिमा र राष्ट्रियता भएकाले अन्य विषय नमिसाउन आग्रह गरेका छन् । झण्डै ३ घण्टा चलेको छलफलमा प्रधानमन्त्री ओलीले भारतसँगको सिमा समस्या समाधानको एक मात्र उपाय वार्ता र कुटनीति नै भएकोमा समेत जोड दिएका थिए ।
छलफलमा प्रमुख प्रतिपक्षी दल नेपाली कांग्रेसका सभापती शेर बहादुर देउवाले संविधान संशोधनको पक्षमा मतदान गर्ने भन्दै त्यसबारे बुधबार बस्ने पार्टीको केन्द्रीय समितिको बैठकमा छलफल गर्ने जानकारी गराएका थिए ।
