काठमाडौं- सरकारले आगामी आर्थिक वर्ष देखि लागू हुनेगरि मोबाइल फोनको रिचार्ज कार्ड र सिम कार्डमा स्वामित्व कर लिने भएको छ । यस अघि पोस्टेपेड नम्बर र ल्याण्डलाइन फोनमा मात्र स्वामित्व शूल्क लाग्दै आएकोमा अब भने प्रिपेड नम्बर र रिचार्ज कार्डमा दुई प्रतिशत टेलिफोन स्वामित्व कर लाग्ने भएको हो ।
आगामी आर्थिक वर्ष देखि टेलिफोन जडान गर्ने प्रत्येक ग्राहकले टेलिफोन स्वामित्व शूल्क वापत ५ सय रुपैयाँ तिर्नुपर्नेछ । टेलिफोनको स्वामित्व परिवर्तन भएको अवस्थामा नयाँ स्वामित्व प्राप्त व्यक्तिले समेत यस्ताे शूल्क तिर्नुपर्ने व्यवस्था अर्थसम्बन्धी प्रस्तावलाई कार्यान्वयन गर्न बनेको विधेयकमा उल्लेख गरिएकाे छ ।
त्यसैगरि ग्राहकबाट असुल गरिएको स्वामित्व शूल्क सेवाप्रदायक कम्पनीले प्रत्येक महिनाको २५ गतेभित्र राजस्व खातामा दाखिला गर्नुपर्ने छ । यसरी शूल्क दाखिला नगरेमा सेवाप्रदायकबाट वार्षिक १५ प्रतिशत ब्याज सहित असुल गरिने व्यवस्था गरिएको छ ।
