नयाँ दिल्ली- महामारीका रुपमा फैलिएको कोरोनाभाइरसबाट संक्रमित हुनेहरुको संख्या भारतमा छ लाख नाघेको छ । सरकारी अधिकारीहरुले बिहीबार दिएको जानकारीअनुसार भारतमा हालसम्म कोरोनाभाइरसबाट ६ लाख ४ हजार ६ सय ४१ जना संक्रमित भएका छन् ।
पछिल्लो २४ घण्टामा मात्रै १९ हजार १ सय ४८ जना कोरोनाभाइरसबाट संक्रमित भएका अधिकारीहरुले जनाएका छन् । केन्द्रिय स्वास्थ्य तथा परिवार कल्याण मन्त्रालयले २ लाख २६ हजार ९४७ जना अझै पनि संक्रमित अवस्थामै रहेको जनाएको छ । कुल सङ्क्रमितमध्ये ३ लाख ५९ हजार ८ सय ६० जना सङ्क्रमणमुक्त भएका मन्त्रालयको तथ्याङ्कमा उल्लेख गरिएको छ ।
गत २४ घण्टामा भारतमा कोरोनाभाइरसबाट ४ सय ३४ जनाको मृत्यु भएपछि हालसम्म यस भाइरसबाट १७ हजार ८ सय ३४ जनाको मृत्यु भएको छ । प्रदेशअनुसार हेर्दा भारतमा सबैभन्दा धेरै संक्रमित महाराष्ट्रमा देखिएका छन् । त्यहाँ कुल संक्रमितको संख्या १ लाख ८० हजार २९८ पुगेको छ । कोरोना भाइरस संक्रमणको कारण महाराष्ट्रमा ८ हजार ५३ जनाको मृत्यु भएको छ ।
त्यसैगरी तमिलनाडुमा ९४ हजार ४९ जना संक्रमित भएका छन् । तमिलनाडुमा संक्रमित मध्ये १ हजार २ सय ६४ जनाको मृत्यु भएको छ । दिल्ली प्रदेशमा ८९ हजार ८ सय २ जना संक्रमित भएका छन् । दिल्लीमा यस भाइरसको कारण २ हजार ८ सय ३ जनाको मृत्यु भएको छ । रासस
