जयश्री संगीत समाजले आयोजना गरेको अनलाइन तबला वादन प्रतियोगितामा निमेश कपाली विजयी भएका छन् । वरिष्ठ तबला वादक रविनलाल श्रेष्ठको स्मृतिमा सञ्चालन गरिएको प्रतियोगितामा कपालीले २५ जना प्रतिस्पर्धीहरुलाई पछि पारेका थिए ।
जितसँगै कपालीले अमेरिकाको टेक्ससस्थित ‘स्कूल अफ इन्डियन परक्युसन एण्ड म्युजिक’को १ महिने अनलाइन छात्रवृत्ति कोर्ष तथा नगद रु १० हजार प्राप्त गरेका छन् ।
अनलाइन तबला वादनको ग्रायण्ड फिनालेमा अजय चौधरी र उजन डंगोलले सबैभन्दा बढी भ्यूज प्राप्त गरेका थिए । प्रतियोगितामा महिला तबलाबादक रुबि श्रेष्ठ लाखे सत्येन्द्र भट्टराई, सपत शाक्य, निर्जल डंगोल, रोजमान महर्जन, राहुल शाक्य, आर्जल डंगोल उत्कृष्ट १० मा पर्न सफल भएका थिए ।
प्रतियोगिताको पहिलो चरणमा ३ मिनेटको वादन भिडियोको आव्हान गरिएको थियो जसमा २५ जना प्रतिस्पर्धी सहभागीता रहेको थियो । अमेरिकामा बस्दै आएका भारतीय तबला वादक गौरीशंकर कर्माकरले उत्कृष्ट तबला वादकहरुको छनौट गरेका हुन् । सुरुवातमा खुल्ला प्रतियोगिता गरेर कार्यक्रमको आयोजना गर्ने बताइए तापनि कार्यक्रम कोरोनाको जोखिमका कारण अनलाईन मार्फत सम्पन्न गरिएको थियो ।
