पूर्वी युरोपेली मुलुक बुल्गेरियामा चार दिनदेखि लगातार सरकार विरोधीप्रदर्शन जारी छ । प्रदर्शनकारीले मुलुकमा भ्रष्टाचार बढेको जनाउँदै बुल्गेरियाको अनुदारवादी सरकारको राजीनामा माग गरेका छन् ।
आइतबार राजधानी सोफियामा तीन हजारभन्दा बढी प्रदर्शनकारीले सरकारी मुख्यालयका साथै संसद् भवनसम्म नाराजुलुससहित पैदलयात्रा गरेका थिए । उनीहरुले बुल्गेरियाको वर्तमान सरकार ‘माफिया’ को चंगुलमा फसेको आरोप लगाएका थिए ।
सरकारविरोधी प्रदर्शन चर्किएसँगै सुरक्षा व्यवस्था कडा बनाउन सुरक्षा फौजलाई सरकारी कार्यालय र संसद् भवनमा तैनाथ गरिएको छ ।
यसैबीच, राष्ट्रपति रुमेन राडेभका कानुनी मामिला तथा भ्रष्टाचार नियन्त्रणसम्बन्धी सचिव एवं सुरक्षा र रक्षा सल्लाहकारलाई पक्राउ गरी उनीहरुका कार्यालयमा छापा मारिएको छ । उनीहरुमाथि राज्यका गोपनीय सूचना चुहाएको आरोपमाथि पनि छानबिन सुरु भएको छ ।
सरकारविरोधी प्रदर्शन आइतबार देशका अरु १० वटा सहरमा पनि भएको थियो । बुल्गेरियाका राष्ट्रपति राडेभले प्रधानमन्त्री बोयको बोरिसोभका मन्त्रिमण्डलमाथि पनि आक्षेप लगाएका छन् । उनले मन्त्रिपरिषद्का सदस्यको चारित्रिक स्थिति कमजोर रहेको बताउँदै आएका छन् ।
प्रधानमन्त्री बोरिसोभले शनिबार राजीनामा गर्न अस्वीकार गरेका छन् । तर, प्रदर्शनमा सहभागीले उनको राजीनामाको माग गर्दै १० लाख हस्ताक्षर अनलाइनबाट प्रेषण गरिएको छ ।
संसदमा मुख्य विपक्षी समाजवादी पार्टीले सरकारविरुद्ध आगामी बुधबार अविश्वासको प्रस्ताव दर्ता गरिने बताएको छ । समाजवादीहरुले आफ्नो पक्षमा समर्थन जनाउन अपिल गरेका छन् ।
शुक्रबारको प्रदर्शन भने केही हिंसात्मक पनि भएको थियो । प्रहरीले १८ जना प्रदर्शनकारीलाई गिरफ्तार गरेको थियो जसमा प्रहरीको कुटाईबाट घाइते भएका दुई जनालाई अस्पताल भर्ना गर्नु परेको थियो । प्रदर्शनकारीमाथि दमन गरेको भन्दै शनिबार अझ बढी मानिस प्रदर्शनमा सहभागी भएका थिए ।
युरोपेली युनियनमा आबद्ध भएको १३ वर्ष बितेको भए पनि बुल्गेरियाको आर्थिक अवस्था अत्यन्त नाजुक छ । ट्रान्सपरेन्सी इन्टरनेसनलले बुल्गेरियामा युरोपेली युनियनमै सबैभन्दा बढी भ्रष्टाचार हुने गरेको जनाएको छ ।