काठमाडौं– स्वास्थ्य तथा जनसंख्या मन्त्रालयले स्वीकृतिबिना नै मनलाग्दी शुल्क लिएर कोरोना भाइरस (कोभिड–१९)को परीक्षण गरेको विषयमा उपत्यकाका तीन अस्पतालमाथि छानबिन गर्न समिति गठन गरेको छ। काठमाडौंका ग्राण्डी, ह्याम्स अस्पताल र जोरपाटीको अत्तरखेलस्थित नेपाल मेडिकल कलेजमाथि छानबिन गर्न मन्त्रालयको गुणस्तर मापन तथा अनुगमन महाशाखाले समिति गठन गरेको हो।
मन्त्रालयका वरिष्ठ औषधि व्यवस्थापक पानबहादुर क्षेत्रीको संयोजकत्वमा ३ सदस्यीय छानबिन समिति गठन गरिएको छ। समितिमा राष्ट्रिय जनस्वास्थ्य प्रयोगशालाका प्याथोलोजिस्ट डा शंकर काफ्ले र स्वास्थ्य मन्त्रालयका जनस्वास्थ्य अधिकृत रविकान्त मिश्र सदस्य रहेका छन्। मन्त्रालयले दुई दिनभित्र प्रतिवेदन बुझाउन समितिलाई निर्देशन दिएको छ।
स्वास्थ्य मन्त्रालयले उपत्याको वीर, पाटन, शिक्षण अस्पताल, सानेपास्थित स्टार अस्पता र सिनामंगलस्थित काठमान्डु मेडिकल कलेजलाई ५ हजार ५०० मात्र शुल्क लिएर परीक्षण गर्न अनुमति दिएको थियो। तर अस्पतालले भने ५ हजारभन्दा बढी शुल्क उठाएको आरोप छ।
