काठमाडौं– सत्तारूढ दल नेपाल कम्युनिस्ट पार्टी(नेकपा)मा विवाद बढेपछि गुटगत भेलाहरु जारी छन् । सोमबार बिहानदेखि नेकपाका अध्यक्ष पुष्पकमल दाहाल प्रचण्ड निवास खुमलटारमा पूर्वमाओवादीका नेताहरुको भेला जारी छ ।
शनिबार बसेको सचिवालय बैठकपछि अध्यक्ष केपी शर्मा ओली र प्रचण्डबीच महाधिवेशन गर्ने सहमति भएको समाचार बाहिरिएपछि विवाद नयाँ मोडमा पुगेको छ ।
ओलीबाट प्रस्तावित महाधिवेशनको विरोध सचिवालयबाटै सुरु भएको छ । ओली महाधिवेशनको विरोध झलनाथ खनाल, माधवकुमार नेपाल र नारायणकाजी श्रेष्ठले गरेका छन् । शनिबार नै राष्ट्रपति कार्यालयबाट फर्केपछि प्रचण्डले पनि आफूले सहमति नगरेको बताएका छन् ।
विवादका बीच नेकपाका नेताहरु आआफ्ना गुटका भेलामा व्यस्त छन् । नेकपामा पछिल्लो समयमा अध्यक्ष तथा प्रधानमन्त्री ओली समूहको भेला बालुवाटारमा हुन्छ भने प्रचण्ड–नेपाल समूहको भेला खुमलटार, कोटेश्वर र भैँसेपाटीमा हुँदै आएको छ ।
आज सोमबार बिहानदेखि नै पूर्वमाओवादीका सचिवालय सदस्य र केही स्थायी कमिटी सदस्यसहित खुमलटारमा प्रचण्डले छलफल गर्दै छन् । नेकपाको स्थायी कमिटी बैठक भोलि बस्दै छ । पटक पटक स्थगित हँुदै आएको बैठकबारे नयाँ रणनीति बनाउन स्थायी कमिटी सदस्यहरुसँग प्रचण्डले छलफल गरेको स्रोतले बताए ।
भोलिका लागि सारिएको बैठक बस्ने नबस्ने अन्योल कायमै छ । आजसम्म ओली प्रचण्ड पटक पटक सहमति गर्न बसे पनि सहमति हुन सकेको छैन ।
खुमलटारमा सचिवालय सदस्य तथा गृहमन्त्री रामबहादुर थापा पनि सहभागी भएका छन् ।
