काठमाडौं– निर्मल शर्मा उर्फ ‘गैंडा’ नेपाली सिने क्षेत्रमा चर्चित छ । निर्मलले नेपाली कलाकारितामा करिब २५ वर्ष याेगदान गरे । यस बिचमा निर्मलले ठूलो पर्दा, टेलिसिरियल, विज्ञापन तथा म्युजिक भिडियोमा अभिनय गरिसके । चलचित्र, पात्र र कथाअनुसार उनले फरक फरक नाम पाए । तर, उनलाई आज पनि दर्शकहरुले ‘गैंडा’का नामले चिन्छन् । यो नाम उनलाई हास्य टेलीशृंखला ‘तीतोसत्य’ले दिएको हो ।
‘तीतो-सत्य’को ५०औँ शृंखलाको छायांकन हुँदै थियो । त्यतिबेला ‘तीतो-सत्य’को छुट्टै क्रेज थियो । तीतोसत्यका दीपकराज गिरी उनको अफिसमा काम गर्ने स्टाप, निर्मलचाहिँ अफिसका हाकिम, यो तीतोसत्य सिरियलकै कुरा हो । हाकिमसँग केही भनाभन गरेर बाहिर निस्किएका गिरीले अफिसका अन्य स्टाफसँग हाकिमलाई गाली गर्ने दृश्य थियो ।
दशैंमा दीपकराज गिरीबाट टीका थाप्दै निर्मल शर्मा । (फोटोः शर्माको फेसबुकबाट)
गालीकै क्रममा गिरीले शर्मालाई ‘गैंडा’ भनेर गाली गरे । यो कुनै योजनाअनुसार गरिएकाे थिएन । सिरियलको स्क्रिप्टमा पनि थिएन । दीपकराज गिरी अहिले पनि सम्झन्छन्, ‘निर्मल शर्मा त्यतिबेला अहिलेभन्दा पनि निकै मोटा थिए । निर्मलकाे हुलिया थियाे पेट पुक्क, गैंडा जस्ताे देखिने अनुहार, भद्दा शरीर, ठूलो पेटले गर्दा असजिलो गरि काम गरिरहेका हाकिमलाई अब के भनेर गाली गरौं भनेर सोच्दै थिए । अनायासै गैंडा भन्ने शब्द मनमा आयो । दिमाग नचलाई भने । पछि यही नाम नै स्थापित भयो ।’
गिरी र शर्मा दुवैले त्यो दिन सम्झदै भने– ‘त्यतिबेला हामी खुब हाँस्यौँ । यो सम्बोधनलाई सिरियलमा राख्ने कि नराख्ने भनेर छलफल पनि भयो । अन्त्यमा राख्ने कुरा भयो, राखियो ।’ सिरियल प्रसारण भएपछि यो नाम निक्कै लोकप्रिय बन्यो । नाम यसरी स्थापित होला भनेर न गिरीले सोचेका थिए । न शर्मालेनै सोचेका थिए ।
गिरी र शर्मा दुवैले त्यो दिन सम्झदै भने, ‘त्यतिबेला हामी खुब हाँस्यौँ । यो सम्बोधनलाई सिरियलमा राख्ने कि नराख्ने भनेर छलफल पनि भयो । अन्त्यमा राख्ने कुरा भयो, राखियो ।’
फोन सम्वादमा गिरी पुराना दिनमा फर्किए– ‘सिरियलमा निर्मल दाइ निकै कचकचे हुनुहुन्थ्यो । सानो–सानो कुरामा पनि हामी झगडा गरिरहन्थ्यौं । तर, रियल लाइफमा निक्कै कुल मान्छे हो उहाँ । झगडालु स्वभाव नै छैन । रियल लाइफमा हुँदै नभएको पक्षले रिलमा जन्माएको नाम हो ‘गैंडा’ ।
तितो-सत्य भन्दा अघि शर्मा ३ वटा फिल्मका निर्माता बनिसकेका थिए । अन्य ५ वटा सिरियलमा काम गरिसकेका थिए । दर्जनभन्दा धेरै विज्ञापनमा काम गरिसकेका थिए । शर्मालाई ‘तितो–सत्य’ त्यही एउटा श्रृंखलाले लोकप्रिय बनायो । जुन श्रृंखलामा ‘गैंडा’ क्यारेक्टर पाए ।
(कलाकार निर्मल शर्माको आज जन्मदिन हो । यस अवसरमा हामीले उनको अर्को नामको जन्म ‘गैंडा’ बारे तयार पारिएको सामग्री ।)
