गलकोट– बागलुङ गलकोटका सूर्य कुँवर तत्कालीन माओवादीद्वारा सुरु सशस्त्र द्वन्द्वमा होमिएका थिए । उनी जनमुक्ति सेनामा सहभागी भए । त्यसताका एक योद्धा बनेर हतियार चलाएका कुँवरका हात अहिले आफ्नै गाउँघरको कृषि कर्ममा समर्पित छन् ।
‘समानताका लागि जनयुद्धमा होमिएको म पछि आफैँ अपहेलित भएर निस्कनुपर्यो त्यसैले पनि ती पुराना दिन सम्झिन म चाहन्नँ,’ उनले भने ।
२०६२/६३ को जनआन्दोलनपश्चात माओवादी शान्ति प्रक्रियामा आइसकेपछि क्यान्टोनमेन्टमै एसएलसी पास गरेका कुँवरको उच्च शिक्षा पढ्ने सपना समेत अुधरै रह्यो । उनलाई उमेर नपुगेको भन्दै ‘अयोग्य लडाकु’ घोषणा गरियो ।
‘सानै उमेरमा कैयौँ सपना बाँडेर जनयुद्धमा सामेल गराएको माओवादीले अयोग्यको बिल्ला भिराउँदै र १० हजार दिएर बिदाइ गर्यो,’ जीवनकै नमीठो अनुभव भएको कुँवरले सुनाए ।
सो १० हजारसमेत नलिने भन्दै उनले तत्कालै फिर्ता गरेर गाउँ फर्केको बताए । उनी अयोग्यको बिल्ला मेट्नै केही समयपछि बिदेसिएको उनको भनाइ छ ।
उनी छ वर्ष मलेसिया बसेर स्वदेश फर्किए । अहिले गाउँमा व्यावसायिक कृषि कर्ममा सक्रिय छन् । फर्ममा २ हजार सिल्भर, कमन र ग्रास जातका माछा र तीन हजार रेन्बो ट्राउट माछा, कुखुरा पालन सुरु गरिएको छ । उनले फार्ममा १० बङ्गुर र मिश्रित कृषि खेती गर्दै आएका छन् । फर्ममा एक ग्रिन हाउस र दुई टनेल छन् । टनेलमा गोलभेंडा, ब्रोकाउली, बन्दालगायतका बेमौसमी र मौसमी तरकारी लटरम्म छन् ।
‘मलेसियामा छ वर्ष कृषि कर्ममै बिताएँ र धेरै कुरा सिक्ने मौका पनि पाएँ,’ उनले भने, ‘विदेशमा सँगालेको अनुभव र सीपलाई स्वदेशमै प्रयोग गर्ने अठोटका साथ कृषि कर्ममा लागेको हुँ ।’
विदेशमा कमाएको ४० लाखले कृषि व्यवसाय सुरु गरेको भन्दै उनले केही ऋण गरेर लगानी गर्दै आए पनि उत्पादन गरेको तरकारी र मासुले बजार पाउँदा खुसी भएको बताउनुभयो ।
‘माछापालन परीक्षणमै छ, एकै पटक पाँच हजार माछा उत्पादन गर्दा राम्रै आम्दानी हुन्छ भन्ने आशामा छु,’ कुँवरले भने, ‘परिवारको राम्रै साथ र सहयोग छ, अवश्य पनि सफल हुनेछु ।’
