म्याग्दी– वर्षा सुरु भएपछि म्याग्दीका विभिन्न बस्तीका घर पुरिए । केहीले ज्यान गुमाए । बाढीले बगाएका तिनै बस्तीमा खानेपानीको हाहाकार भएको छ । पश्चिम म्याग्दीको बाढीपहिरो प्रभावित क्षेत्रमा विगत २० दिनदेखि खानेपानीको हाहाकार भएको छ ।
म्याग्दीका मराङ, मालिका बिम, बेनी, बगरफाँटमा पहिराले खानेपानीको मुहान पुरिदिएपछि खानेपानीको समस्या भएको हो । गत असार २६ गते गएको पहिरोले गाउँ नजिकैको पानीको मुहान पुरियो । पानी वितरण गरिने मुख्य ट्याङ्की र पाइप बगायो । त्यस क्षेत्रका विस्थापितलाई पिउने पानीको समस्या भएको छ ।
‘पहिरोलो बस्तीभित्र ल्याएको खानेपानीको पाइप बगायो । तत्काल पाइप ल्याउने सम्भावना छैन । मुहानसमेत पहिरोले पुरेको छ । अब तिर्खा मेट्न कहाँ जाने ?’ पीडितले बताए । अहिले त्यस क्षेत्रका स्थानीय पानी कहिले पर्छ र गाग्री भरौं भन्ने पर्खाइमा हुन्छन् ।
धारामा पानी आउन छोडेपछि सरसफाइमा समेत समस्या भएको छ । १७ हजार जनसंख्या भएको यो बस्तीका २१ घर पहिराले पुरिदिएको छ । २०२ घर उच्च जोखिम छन् । ४० घरपरिवार विस्थापित भएका छन् ।– रासस
