काठमाडौं– प्रधानमन्त्रीलाई जनस्वास्थ्य क्षेत्रका विज्ञहरूले कोरोना भाइरसको प्रकोप बढ्दै गएकाले दुई हप्ता लकडाउन गर्न सुझाव दिएका छन् ।मंगलबार बालुवाटारमा प्रधानमन्त्रीसँग भएको जनस्वास्थ्य क्षेत्रका विज्ञहरूको छलफलमा यस्तो सुझाव दिइएको हो ।
छलफलमा सहभागी जनस्वास्थ्य क्षेत्रका विज्ञहरूले लकडाउन गर्नुपर्ने धारणा राखेका हुन् । अवस्था भयावह हुनेतर्फ गएकाले लकडाउन नगरेमा थप क्षति हुन सक्ने सुझाव दिएको बैठकमा सहभागी डा. भगवान काेइरालाले बताए । विज्ञहरूले कर्फ्युसमेत लगाउन सुझाव दिएको काेइरालाले जानकारी दिए ।
वीरगन्ज, काठमाडौंलगायतका देशका विभिन्न क्षेत्रमा कोरोना भाइरसको प्रकोप बढ्दै गएपछि प्रधानमन्त्री ओलीले विज्ञहरूसँग छलफल गरेका हुन् । छलफलमा प्रमुख विपक्षी दलका नेता शेरबहादुर देउवा, जनता समाजवादी पार्टीका अध्यक्ष महन्थ ठाकुर, कोभिड १९ संकट व्यवस्थापन केन्द्र (सिसिएमसी) मा रहेका मन्त्रीहरू र जनस्वास्थ्य क्षेत्रका विज्ञहरू सहभागी थिए ।
