काठमाडौं - कैलालीको गोदावरी नगरपालिकाले कोरोना रोकथाम तथा नियन्त्रणका लागि ३ करोड २८ लाख ४७ हजार ४ सय १४ रुपैयाँ खर्च गरेको छ ।
नगरपालिकाले गत असार मसान्तसम्म मेडिकल सामग्री, रेनकोट तथा मास्क खरिद, इन्धन, खाद्यान्न, खाना, भ्रमणभत्ता, झुल खरिदलगायत शीर्षकमा सो रकम खर्च भएको जनाएको छ ।
नगरपालिकाले स्थापना गरेको कोरोना कोषमा सुदूरपश्चिम प्रदेश सरकारले ६६ लाख ४० हजार, सङ्घीय सरकारबाट ३० लाख ३८ हजार ३२५, नगरपालिकाबाट २ करोड ५० लाख, नगरपालिका कर्मचारीबाट ४ लाख ६५ हजार १४, सामुदायिक विद्यालयका शिक्षकबाट ११ लाख ६८ हजार ४ सय २० रुपैयाँ जम्मा भएको थियो ।
त्यस्तै बाह्रवन साझेदारी वन व्यवस्थापन समितिबाट १ लाख ५० हजार, अत्तरिया साना सहकारी खानेपानीबाट ५१ हजार, कञ्चन डेभलपमेन्ट बैंकका प्रबन्धकबाट १० हजार तथा विभिन्न सङ्घसंस्थाबाट कोषमा कुल ३ करोड ६५ लाख ७५ हजार ७ सय ५९ रुपैयाँ जम्मा भएको थियो ।
नगरपालिकाले स्थापना गरेको कोषबाट नगरपालिका कार्यालयले इन्धन खर्चबापत ३ लाख १ हजार ९१४, राहत तथा क्वारेन्टिन खाद्यान्नबापत ६६ लाख ९९ हजार ६७३, मेडिकल सामग्री खरिद १ करोड छ लाख ४२ हजार ३९८, रेनकोट र मास्क खरिदमा रु १५ लाख ५३ हजार ८६२, भ्रमणभत्ता ४२ हजार, झुल खरिद ६ लाख ८९ हजार र स्यानेटाइजेसनमा २ लाख दुई हजार ५ सय ३३ खर्च भएको नगरपालिकाका लेखा अधिकृत रामचन्द्र जोशीले जानकारी दिए ।
यस्तै खाना व्यवस्थापन खर्चअन्तर्गत १ लाख ४८ हजार ४ सय ५३ खर्च गरेको छ भने कार्यालयले बैठक खर्चबापत सो अवधिसम्ममा १ लाख ३५ हजार खर्च भएको छ । रासस
