काठमाडौं– सरकारले बाढीपहिरो पीडितका लागि राहत, सहायता र सहयोग उपलब्ध गराउने निर्णय गरेको छ । भदौ १ गते बसेको मन्त्रिपरिषद् बैठकले विपद् पीडित उद्धार र राहतसम्बन्धी मापदण्ड, २०६४ (संशोधनसमेत) को व्यवस्थाबमोजिम राहत तथा सहयोग उपलब्ध गराउने निर्णय गरेको हो ।
‘विपद्को घटनामा परी कुनै परिवारमा एक जनाको मृत्यु भएमा २ लाख र सोही परिवारमा अन्य व्यक्तिसमेतको मृत्यु भएमा प्रतिव्यक्ति थप १ लाखका दरले राहत उपलब्ध गराउने भएको छ,’ सरकारका प्रवक्ता डा. युवराज खतिवडाले भने ।
त्यस्तै, घर नष्ट भएका र खाद्यान्नसमेत नभएमा प्रतिपरिवार पाँच जनासम्म सदस्य भएको परिवारलाई १५ हजार र पाँचभन्दा बढी सदस्य भएको परिवारलाई २० हजारका दरले नगद सहायता गर्ने निर्णय भएको छ ।
‘नयाँ घर नै निर्माण गर्नुपर्ने भएमा प्रतिपरिवारलाई १ लाखसम्म सहयोग गर्ने निर्णय गरिएको छ,’ खतिवडाले भने । त्यस्तै, घर निर्माणका लागि आवश्यक काठ प्रचलित कानुनबमोजिम जिल्लास्थित वन कार्यालयमार्फत सहुलियत दरमा उपलब्ध गराउने निर्णय गरेको छ ।
सरकारले घाइतेकाे उपचार खर्च र यातायात खर्चसमेत बेहाेर्ने निर्णय गरेकाे छ ।
