ठेस् लाग्दा हामी अनायासै ‘अइया बाबा’ भन्छौं । मानौं यो शब्द नै एउटा ‘शक्ति’ हो, जसले ठेस्बाट जोगाउँछ । हिन्दु ग्रन्थलाई मान्ने हो भने गुरु, माता र पितालाई भगवानको मानव रुप भनिन्छ । रक्षक, पालनकर्ता, जन्म र कर्म दिने व्यक्ति र संसार चिनाउने व्यक्तिलाई बुबाको रुपमा परिभाषित गरिएको छ ।
नेपाली समाजमा गोकर्ण औंसी अर्थात् कुशेऔंसी बुबाको मुख हेर्ने दिनका रूपमा प्रसिद्ध छ । यस पटकको बुबाको मुख हेर्ने दिन पनि कोरोनाको कारण प्रभावित भएको छ । यहीबीच केही सेलिब्रेटीहरुले आफ्ना बुबालाई कसरी सम्झिन्छन् त ?
बुबालाई पहिलो महिनावारी भएको खबर
– नायिका सञ्चिता लुईंटेल
सरकारी जागिरे आमाबुबाका छोरी म । ३ दिदीबहिनीमा जेठी छोरी म अलि बढी बुबासँग मिल्थेँ । घरमा सम्पूर्ण पत्रपत्रिकाहरु सबै आउँथ्यो । विहान १ घण्टा बुबासँगै बसेर पत्रपत्रिकाहरु पढ्न लगाउनुहुन्थ्यो । म पनि मख्ख भएर पढ्थें । त्यस बेलाको पढ्ने बानीले मलाई चलचित्र क्षेत्रमा धेरै सजिलो भयो । बुबा अभिभाभवक मात्रै थिएन मेरो लागि मिल्ने साथी पनि हो ।
उहाँसँग म कति नजिक छु भने मेरो पहिलो महिनावारी भएको खबर पनि बुबालाई नै पहिलोपटक भनेको थिएँ । धेरैले यी कुराहरु पहिलोपटक आमासँगै सेयर गर्छन् । तर बुबा यति सजिलो हुनुहुन्थ्यो कि जस्तो कुरा पनि पनि सहजै लिइ दिनुहुन्छ । महिनावारी भएपछि बुबालाई १२ दिन हेर्न हुन्न भन्दा मलाई सबैभन्दा गाह्रो भएको थियो ।
१२ दिनको लागि लुकाउनुभयो । बुबाको मुख हेर्नै ठीक २ दिन अघिको घटना हो । मलाई सारै नमज्जा लाग्यो, मैले ढीपी गरें, बुबाको खुट्टा मात्रै भए नि देखाइदिनु । मेरो यो कुराले बुबालाई नमज्जा लागेछ, लुकाउन दिनुभएन । साामाजिक परम्परालाई मान्ने भए पनि छोरीहरुको सुविधाको लागि जस्तो कदम पनि चाल्न पछि हट्नु हुन्न । बुबालाई म वकिल वा सरकारी जागिरे भएको हेर्ने इच्छा थियो । तर चलचित्र प्रतिको मेरो इच्छा सुनाउँदा सहर्ष स्वीकार्नुभयो ।
जीवनको हरेक निर्णयमा उहाँको स्वकृति लिन खोज्छु । अहिले २ सन्तानको आमा आफै भइसकें । तर बुबाप्रति उत्तिकै निर्भर छु । आमावाट न्यानो माया पाएँ भने बुबावाट प्रोत्साहन र प्रेरणा ।
बुबाले नसम्हाल्नु भएको भए के हुन्थें
– उषा खड्गी, मिस नेपाल/तथा फेशन डिजाइनर
छोरीमान्छे सफल हुनुमा बुबाको ठूलो हात हुन्छ भन्ने भनाइ मेरो जीवनमा ठ्याक्कै मिलेको छ । ३ जना दिदीबहिनी एक जना भाइमध्ये म सबैभन्दा प्यारी छोरी पनि हुँ । म वीरगञ्जमा जन्मेर हुर्केको मान्छे । म एक्लै लाई काठमाडौंमा पठाएर मिस नेपालको लागि स्वीकृति दिनु भयो ।
२० वर्षअघि छोरीलाई काठमाडौंमा एक्लै पठायो भनेर कुरा काट्नेहरुको सामना गर्नुपर्यो, बुबालाई । मेरो हरेक निर्णयलाई ठिक छ भनेर स्वीकृति दिनुहुन्थ्यो । म बुबासँग खुलेरै बोल्थेँ । मिस नेपालको सन्दर्भमा पनि उहाँले तिमी सक्छौ भने गर, हारे पनि केही हुन्न । जित मात्रै सबै कुरा होइन भनेर मलाई मार्गदर्शन दिनुहुन्थ्यो । त्यति बेला एक्लै काठमाडौं आउन नदिनु मात्रै भएको भएपनि आजको सफलता सम्भव हुँदैन थियो । बुबा राम्रो फोटो खिच्न रुचाउने व्यक्ति पनि हो । धेरै फोटोहरु खिचेर मेमोरीको रुपमा पनि राख्नुभएको छ ।
जीवनमा धेरै खालको तनावहरु आउने गर्छ र मलाई आएका मानसिक तनावहरुमा मज्जाले हौसला दिने व्यक्ति पनि बुबा नै हो । जे हुन्छ राम्रोको लागि हुन्छ भन्ने सोच र जस्तो परिस्थितिलाई पनि सहज तरिकाले लिने बानीबाट साह्रै प्रभावित छु । समय ठीक हुँदा सही लाग्ने कुरा पनि समय ठिक नहुँदा गलत हुन्छ भन्ने उहाँको भनाईलाई आत्मसात गरि अघि बढिरहेछु ।
मैले वैवाहिक जीवनलाई टुंग्याउने निर्णयमा केही समय रिसाउनु भयो, सकभर मिलाउन खोज्नुभयो तर यथार्थलाई बुझ्दै गएपछि बुबाले सपोर्ट गर्नु भयो । सायद त्यति बेला बुबाले नसम्हाल्नु भएको भए म के हुन्थें, मलाई नै थाहा छैन ।
बाबासँग बसेर क्रियटिभीटी
– अस्मी श्रेष्ठ, मिस नेपाल
बाबा मेरो क्लोज फ्रेण्ड हो । मेरो इच्छाको लागि जे पनि गर्ने तत्पर हमेरो बाबा मेरो जीवनको प्रेरक व्यक्ति हुनुहुन्छ । मिस नेपालमा भाग लिने कुरामा होस् वा पढाइको विषयमा नै किन नहोस् मेरो इच्छामा कुनै रोकटोक लगाउने काम भएन । सकारात्मक सोच राख्नुपर्छ, सकरात्मक पक्षले वरपरका नकरात्मक चिजहरु पनि आफै हराउछ भन्ने बाबाको भनाइवाट सारै नै प्रभावित छु ।
बाबासँग आफ्नो, परिवेशको र देशकै विषयमा पनि कुराकानी गरि रहेका हुन्छौं । अहिले त झनै ५, ६ महिना देखि घरमै बाबासँग बसेर क्रियटिभीटीका काम, रमाइला कुराहरु गर्ने समय मिलेको छ । म सानोभन्दा सानो कुरा पनि पहिले बाबासँग गर्ने रुचाउँछु ।
बाबा आइडियल
– मुना गौचन, मोडल
संसारकै उत्कृष्ट ड्याडको रुपमा म आफ्नो ड्याडलाई लिन्छु । हुन त हरेकलाई आफ्नो बाबा आइडियल र उत्कृष्ट लाग्छ नै होला । तर मेरो जीवनमा जति पनि पारिवारिक सम्बन्धहरु छन्, त्यस मध्यको बेस्ट रिलेसन ड्याडको र मेरो छ ।
मेरो स्वभाव अलि अन्यौल खालको छ । के गर्ने, के नगर्ने, सही के ? गलत के ? दोधारमा हुन्थें । यसको निक्यौल सधैं ड्याडले नै निकालि दिनुहुन्थ्यो । धेरै साथीहरुका बाबाहरु कडा अनुशासनमा राख्ने र डरलाग्दो हुन्छ भन्ने सुन्थें । तर मेरो हकमा ड्याड धेरै रमाइलो गर्नु पर्ने, शान्त र प्रकृतिप्रेमी हुनुहुन्छ ।
बरु ड्याडको अनुपातमा ममी कडा हुनुहुन्छ । ड्याडले सधै तिमीलाई के र्ने मन छ त्यही गर, कुनै पनि कुरामा फोर्स गर्दिन भन्नुहुन्थ्यो । म मेडिकल कलेजमा पढ्दै मोडलिङ र अभिनयलाई पनि साथ लैजादैं थिएँ । ड्याडले नै यी दुई क्षेत्रलाई सँगै लैजानु हुँदैन ।
सफल हुनको लागि एउटा मात्रै बाटो रोज भन्नुभयो । मैले ड्याडकै सल्लाहमा मेडिकल पढाइलाई तिलाञ्जली दिएर मोडलिङ र अभिनयलाइ रोजेँ । इन्डियामा गएर एक्लै संघर्ष गर्ने पनि ड्याडीले प्रोत्साहन गर्नुभयो धेरै साथीहरुले तिमी कति भाग्यमानी है, यति धेरै माया र विश्वास गर्ने बाबा पाएकी छांै भन्दा ड्याडप्रति अझैं सम्मान बढेर आउँछ । आइ लभ यु ड्याड ।
