काठमाडौं– अगस्ट ७ मा कोरोना संक्रमित भएका लोकगायक प्रेमराजा महत र उनकी श्रीमती कविता महत कोरोनामुक्त भएका छन् । महतले आफूहरू कोरोना संक्रमणमुक्त भएको भन्दै फेसबुकमार्फत शुभचिन्तक सबैलाई आभार प्रकट गरेका छन् ।
उनले फेसबुकमा लेखेका छन्, ‘पछिल्लो परीक्षणबाट हामी पूर्ण रुपमा कोरोनामुक्त भएको जानकारी गराउन चाहन्छौं । विश्वभरि रहनुभएका हाम्रा हजारौं हजार इष्टमित्रहरूको आशिर्वाद र मायाले हामीलाई यति ठूलो हिम्मत दियो । जुन हिम्मतले हामी कोरोनालाई जित्न सफल भयौं ।’
उनले अगाडि लेखेका छन्, ‘जुन रोग औषधिबाट निको हुन्छ भन्ने आशा छैन । कोरोनालाई सानो रोग नसम्झनु होला । ठूलै पनि होइन, नडराउनु होला । राम्रो मेन्टेन गर्न सक्दा कोरोना निको हुन्छ । लापरवाही गरे ज्यानै लिन्छ ।’
गायक प्रेमराजा महतले फेसबुकमा लामो स्टाटस लेख्दै आफूलाई कोरोना लागे नलुकाउनसमेत सबैलाई आग्रह गरेका छन् । उनले कोरोना लागेर निको भएको व्यक्ति पूर्णरुपमा पहिलाको जस्तै नर्मल हुने भन्दै एक पटक रोग लागेको मानिसलाई फरक व्यवहार नगर्न आग्रह गरेका छन् ।
अमेरिकामा बस्दै आएका गायक दम्पति कोरोना संक्रमणपछि आफ्नै घरमा छोरा डा. सरगम महतको निरीक्षणमा बसेका थिए ।
