काठमाण्डौं - लायन्स क्लव इन्टरनेशनल डिष्ट्रिक्ट ३२५ वि २ ले संचालन गरिरहेको लायन्स कविता यात्राको छैठौं इपिसोडमा साहित्यकार एवं संगीत नाट्य प्रज्ञा प्रतिष्ठानका पूर्व कूलपति सरुभक्त उपस्थित हुने भएका छन् ।
साहित्यलाई सामाजिक क्षेत्रमा सक्रिय भैरहेका व्यक्तित्व सामु पु¥याउने उदेश्यले सुरु गरिएको लायन्स कविता यात्रामा अहिले सम्म पचासजना भन्दा बढी कविले कविता वाचन गरिसकेका छन् । कार्यक्रमको संयोजन कवि भोजराज न्यौपानेले गरिरहेका छन् ।
विभिन्न व्यवसायमा संलग्न भएका लायन्सका सदस्यहरुले नेपाली कवि र कवितालाई निकै रुचीपूर्वक सुनिरहेको आयोजकले बताएका छन् । प्रत्येक शुक्रबार बेलुका ८ बजे हुने कविता यात्राको छैटौं इपिसोड यही असोज ९ गते हुनेछ ।
कार्यक्रममा साहित्यकार सरुभक्तका अतिरिक्त कविहरु प्रोल्लास सिन्धुलिय, हेमन्त विवश, बाबु त्रिपाठी, दिपा राई पुन, होमनाथ घिमिरे, प्रभाकर पण्डित, सुमन घिमिरे लगायतका कविहरुले कविता वाचन गर्नेछन् ।
