काठमाडौं– प्रदेश ५ को प्रदेशसभा बैठकमा स्थायी राजधानी र नामकरणको विषयमा फरक मत राख्दै कांग्रेस नेताहरू तोडफोडमा उत्रिएको घटनालाई लिएर कांग्रेसले प्रतिपक्षको भूमिका निर्वाह गर्न नसकेको आरोप लगाइएको छ । नेकपाका नेता तथा कार्यकर्ताले प्रदेशसभा बैठकमा कांग्रेस नेताहरू गुन्डागर्दीको शैलीमा प्रस्तुत भएर कांग्रेसले प्रतिपक्षको भूमिका बिर्सिएको आरोप लगाएका हुन् ।
प्रधानमन्त्री केपी शर्मा ओलीका प्रेस सल्लाहकार सूर्य थापाले प्रदेश ५ को प्रदेशसभा बैठकमा सोमबार भएको तोडफोडलाई गुन्डागर्दीको संज्ञा दिएका छन् । उनले ट्वीटरमा लेखेका छन्, ‘ताण्डव नृत्य नै चलेछ । उहाँ माननीयज्यूहरूको तस्बिर बैठक हलकै भित्तामा माउन्ट गरी सुनौला अक्षरमा सुरक्षित राख्दा बढी स्मरणीय हुन्छ होला । जनमतविपरितको यस्तो जबर्जस्ती, तोडफोड र गुन्डागर्दीलाई लोकतान्त्रिक अभ्यासकै पर्याय मानिदिने त हो ?’
उनले सांसदले तोडफोड गर्दा मर्यादापालकहरू निरीह बनेकोसमेत बताएका छन् । उनले तोडफोडमा संलग्न व्यक्तिलाई उन्मुक्ति दिन नहुने बताएका छन् । उनले लेखेका छन्, ‘जमाना खराब छ– सांसदको बोल्ने अधिकार संविधान कानुनबमोजिम अनतिक्रम्य छ, तर तोडफोड गर्नु, अशिष्ट र असंसदीय शब्द प्रयोग गर्नु त अपराध हो । अपराधमा उन्मुक्ति हुँदैन ।’
त्यस्तै, रक्षामन्त्री ईश्वर पोख्रेलले प्रदेश ५ का मुख्यमन्त्री शंकर पोखरेलमाथि सुनियोजित रुपमा हमला गरिएको भन्दै घटनाको निन्दा गरेका छन् । उनले लेखेका छन्, ‘प्रदेश ५ को नामकरण र राजधानीका सम्बन्धमा प्रदेश सभामा प्रकृयासम्मत छलफल र निर्णय प्रकृया अगाडि बढिरहेका बेला मुख्यमन्त्री शंकर पोखरेलमाथि गरिएको सुनियोजित हमला निन्दनीय छ । सबैले बुझ्नुपर्छ– विधि र प्रकृया स्वीकार गरेर मात्र लोकतान्त्रिक हुन सकिन्छ ।’
कांग्रेसमाथि लगाइएको आरोप स्विकार्दै कांग्रेस नेता गगन थापाले ट्वीट गरेर आफ्ना नेता तथा कार्यकर्तालाई प्रतिपक्षको भूमिका के कस्तो हुने भन्ने बारेमा सिकाउन नसकेको बताएका छन् । उनले लेखेका छन्, ‘प्रतिपक्षले सरकारको जस्तोसुकै नाजायज हठका विरुद्ध आवाज उठाउन पाउछ, पाउनुपर्छ । आवाज उठाउने तरिका संसदीय अभ्यासभित्रै छ। प्रतिपक्षको भूमिका के कस्तो हुने भन्नेमा हामीले आफ्ना नेता कार्यकर्तालाई सिकाउन नसकेकै हो ।’
गगन थापाले प्रदेश ५ को संसद्भित्र प्रतिपक्षबाट भएको व्यवहार संसदीय मर्यादा र प्रतिष्ठाविपरीत भएको समेत बताएका छन् । उनले ट्वीटरमा लेखेका छन्, ‘संसद्मा आफ्नो फरक मत राख्ने र सरकारको विरोध गर्ने अनेकन् तरिका छन् । सोमबारको तरिका संसदभित्र पूर्णत अवाञ्छनीय छ । हामीले यो घटनामा आत्मालोचना गर्दै गल्ती गर्नेलाई कारबाही पनि गर्नैपर्छ।’
कांग्रेस नेता अर्जुनरसिंह केसीले संसदीय लोकतन्त्रमा संसद् सरकारमा होइन, सरकार संसदमा हुने बताएका छन् । उनले भनेका छन्, ‘कुर्सी भाँच्ने र तोडफोड वा हिंसात्मक शैली र संस्कृति न कांग्रेसी हो न लोकतान्त्रिक र संसदीय हो ।’
