चितवन– कृषि तथा वन विज्ञान विश्वविद्यालय रामपुरको रिक्त रजिस्ट्रार पदमा ११ जनाको आवेदन परेको छ । विश्वविद्यालयले गत असोज २२ गते रजिस्ट्रार र दुई सङ्कायका डिनका लागि आवेदन खुलाएको थियो ।
विश्वविद्यालयका उपकुलपति प्राडा. पुण्यप्रसाद रेग्मीका अनुसार रजिस्ट्रारका लागि ११, कृषि सङ्कायको डिनका लागि सात र पशु विज्ञान, पशुचिकित्सा र मत्स्य विज्ञान सङ्कायका लागि आठ जनाको आवेदन परेको छ ।
रजिस्ट्रारका लागि प्राडा. अरविन्द श्रीवास्तव, प्राडा. कालिकाबहादुर अधिकारी, प्राडा. केशव अधिकारी, प्राडा. दिलीपकुमार झा, प्राडा. पुष्करबहादुर पाल, प्राडा. बलरामकुमार भट्ट, प्राडा. भूमिनन्द देवकोटा, प्रा. मुकेशकुमार सिंह, प्राडा मोहन शर्मा, प्राडा शारदा थपलिया र प्रा श्यामशङ्कर झाको आवेदन परेको उनले जानकारी दिए ।
कृषि सङ्कायका डिनका लागि प्राडा. अर्जुनकुमार श्रेष्ठ, प्राडा. अरविन्द श्रीवास्तव, प्राडा कल्याणी मिश्र त्रिपाठी, प्रा. जयप्रकाश दत्त, प्रा. विष्णुराज ओझा, डा. शिवचन्द्र ढकाल र डा. सन्तोष मरहट्ठाको आवेदन परेको छ । पशु विज्ञान, पशु चिकित्सा र मत्स्य विज्ञान सङ्कायकको डिन पदका लागि प्राडा. पुष्करबहादुर पाल, प्राडा. भूमिनन्द देवकोटा, डा. मनोजकुमार शाह, प्रा. मातृकाप्रसाद जमरकट्टेल, प्रा. मुकेश कुमार सिंह, प्राडा. सुनिला राई, डा. सुवीर सिंह र प्राडा. होमबहादुर बस्नेतको आवेदन परेको छ ।
उपकुलपति रेग्मीले रजिस्ट्रार छनोटका लागि समिति बनाउन लागिएको जानकारी दिए । समितिले पाँच दिनभित्र आवेदक मध्येबाट तीन जनालाई छनोट गर्ने छ । उनीहरुमध्येबाट एक जनालाई रिक्त रजिष्ट्रार पदमा नियुक्तिका लागि कुलपतिसमक्ष सिफारिस गर्ने उनले बताए ।
डिनको नियुक्ति भने कार्यकारी परिषदबाट हुनेछ । सबै काम यथाशीघ्र सम्पन्न गरी आगामी मङ्सिर १५ भित्र विश्वविद्यालय सभा (सिनेट) बस्ने तयारी गरिएको उनले जानकारी दिए । सिनेटमा विश्वविद्यालयका सदस्य सचिव एवं रजिस्ट्रारले वार्षिक बजेट पेस गर्नुपर्ने हुन्छ ।
गत वर्षको भदौदेखि विश्वविद्यालयको उपकुलपति पद रिक्त रहेको थियो । सरकारले गत असोज ९ गते प्राडा. रेग्मीलाई विश्वविद्यालयको उपकुलपतिमा नियुक्त गरेको थियो । गत माघ १२ देखि रजिस्ट्रार र गत जेठ १ देखि दुई सङ्कायका डिन रिक्त छ ।
