एजेन्सी– विराट कोहलीको कप्तानीमा रहेको रोयल च्यालेन्जर्स ब्याङ्ग्लोरले इन्डियन प्रिमियर लिग (आईपीएल) २०२० को प्ले अफमा स्थान पक्का गरेको छ । लिगको आफ्नो अन्तिम खेलमा दिल्ली क्यापिटल्ससँग पराजित भएपनि ब्याङ्ग्लोरले नेट रन रेटमा कोलकतालाई पछि पार्दै प्ले अफमा स्थान बनाएको हो ।
लिगको शीर्षस्थानमा रहेको मुम्बई इन्डियन्स् र दोस्रो स्थानमा रहेको दिल्ली क्यापिटल्सल पनि प्ले अफमा स्थान बनाइसकेका छन् । मंगलबार साँझ हुने मुम्बई र सनराइजर्स हैदराबादबीचको खेलको नतिजाले प्ले अफमा पुग्ने चौथो टोलीको टुङ्गो लाग्नेछ । उक्त खेलमा मुम्बइविरुद्ध विजयी भएमा हैदराबाद प्ले अफमा जानेछ भने पराजित भएमा कोलकता नाइट राइडर्स प्ले अफमा जानेछ ।
तीन बलिया टोलीले प्ले अफमा स्थान बनाएसँगै आईपीएल २०२० को उपाधि कसले जित्ला भनेर विभिन्न अड्कलबाजीहरु भइरहेका छन् । कतिपय खेलप्रमी तथा खेलाडीहरुले त आईपीएलको उपाधि जित्ने टोलीको अनुमानसमेत गरीसकेका छन् ।
यसैबिच इंल्याण्ड क्रिकेट टिमका पूर्व कप्तान माइकल वानले पनि यसबारे आफ्नो प्रतिक्रिया दिएका छन् । पूर्व कप्तान वानले कोहलीको टिम आरसीबीले आईपीएलको उपाधि जित्न नसक्ने बताएका छन् ।
वानले आरसीबीमा अनुभवी खेलाडीको कमी भएको जनाउँदै उपाधि जित्ने क्षमता नभएको जनाए । आरसीबीले ब्याक टु ब्याक ३ नकआउट खेलको दबाब झेल्न नसक्ने वानको ठम्याई छ ।
