काठमाडौं– नेपाली बैंकहरुले राष्ट्र बैंकले दिएको निर्देशनलाई उल्लंघन गर्दै ऋण दिन थालेका छन्। बैंकहरुले कोभिड सहुलियतको फण्डा प्रयोग गर्दै पहुँचवाला ऋणीलाई आधार दरभन्दा तल गएर ऋण दिने गरेका छन्।
राष्ट्र बैंकको निर्देशन अनुसार, विपन्न वर्गमा लगानी गर्ने लघुवित्त संस्थालाई बाहेक अरुलाई आधार दरभन्दा तल गएर ऋण दिन पाइँदैन। तर, अरुलाई पनि आधार दरभन्दा तल ऋण दिन केही बैंकले कोभिड सहुलियतको प्रयोग गर्दै राष्ट बैंकलाई नै झुक्याउने प्रयास गरिरहेका छन्।
राष्ट्र बैंकले एक बैंकबाट अर्कै बैंकमा ऋण सार्दा (प्रिपेमेन्ट– एउटाको भुक्तानी गरेर अर्कोमा जान) कुल ऋणको ०.१५ प्रतिशतभन्दा बढि शुल्क लिन नपाइने व्यवस्था गरेको छ। त्यसकारण ग्राहकहरु सस्तो ब्याज भएको बैंकतिर आकर्षित भइरहेका छन्।
केही ग्राहक भने आधार दरभन्दा पनि कममा ऋण लिने प्रयासमा रहेका छन्। त्यस्ता ग्राहकलाई पनि आफ्नो बैंकमा तान्नका लागि बैंकहरुले कोभिड सहुलियतको उपयोग गरिरहेका छन्।
धेरैजसो बैंकले सुरुमा ग्राहकलाई आधार दरमै ऋण दिन्छन्।अनि ब्याज तिर्ने समय आएपछि कोभिड सहुलियत भन्दै तिर्नु पर्ने ब्याजमा ५/१० प्रतिशत छुट दिने गरेका छन्। अहिले बैंकहरुले गरिरहेको बदमासीका बारेमा जानकारी भइसके पनि राष्ट्र बैंकले यसमा कुनै प्रतिक्रिया जनाएको छैन।
राष्ट्र बैंकले नै ध्यान नदिँदा गलत अध्यास भइरहेको एक बैंकर बताउँछन्। यस्ता गलत कदम नियन्त्रण नगर्ने हो भने प्रोफेसनल हिसाबले चलेका बैंकहरु पनि गलत अभ्यासमा लाग्ने खतरा बढेको उनी बताउँछन्।
यसअघि बैंकबीच लघुवीत्तको ऋण खोस्ने अभ्यास चलेको थियो। आधार दरभन्दा तल जान पाइने भएकाले बैंकहरुबीच बढी भएको तरलता अर्को बैंकको लघुवित्तको ऋण खोस्नमा प्रयोग भएको थियो। त्यसअघि आधार दरमै अर्को बैंकको ऋण खोस्ने अभ्यास चलेको थियो। यो अभ्यासका कारण एक बैंकमा खराब हुन लागेको ऋण अर्को बैंकमा असल भएको थियो।
