परीक्षा दिन घरबाट निस्किएकी युनिका बुढाथोकी अब फेरि घर फर्किने छैनन्। कक्षा ११ को परीक्षा दिन गएकी युनिकाको सपना पनि सडकमै बिलाउन पुगेको छ।
उदयपुरमा स्कुटर दुर्घटना हुँदा उनको मृत्यु भएको हो। त्रियुगा नगरपालिका–१० स्थित मदन भण्डारी आँखा अस्पताल नजिक भएको भएको दुर्घटनामा त्रियुगा नगरपालिका–९ राजाबासकी १९ वर्षीया बुढाथोकीको मृत्यु भएको हो।
राजाबासबाट गाइघाटतर्फ जाँदै गर्दा को४९प ९०७० नम्बरको स्कुटर अनियन्त्रित भएर दुर्घटना हुँदा बुढाथोकीको मृत्यु भएको हो। घटना सोमबार बिहानको हो।
प्याराडाइज बोर्डिङ स्कूलको कक्षा ११ मा अध्ययनरत बुढाथोकी परीक्षा दिन जाँदै थिइन्। स्कुटरमा दिदीभाइ सवार थिए। स्थानीय खड्गबहादुर बुढाथोकीकी छोरी हुन् युनिका।
दुर्घटनामा बुढाथोकीका भाइ सामान्य घाइते भएका छन्। प्रहरीका अनुसार जिल्ला अस्पताल उदयपुरमा सामान्य उपचारपछि उनी घर फर्किएका छन्।
दुर्घटनामा गम्भीर घाइते भएकी बुढाथोकीको जिल्ला अस्पतालमा सामान्य उपचारपछि विराटनगर रेफर गरिएको थियो। न्यूरो हस्पिटल विराटनगरमा उनको मृत्यु भएको हो।
