काठमाडौं– कोरोना संक्रमित डा. गोविन्द केसीले आफ्नो उपचार खर्च आफैं व्यहोर्ने जानकारी दिएका छन्। यसअघि सरकारले केसीको उपचार खर्च व्यहोर्ने बताएको थियो।
शनिबार प्रधानमन्त्री केपी शर्मा ओलीले ट्वीटरमार्फत डा. केसीको स्वास्थ्यलाभको कामना गर्दै सम्पूर्ण उपचार खर्च सरकारले व्यहोर्ने बताएका थिए। तर डा. केसीले आफ्नो उपचार खर्च आफैं व्यहोर्ने बताउँदै सरकारलाई नागरिकप्रति उत्तरदायी हुन आग्रह गरे।
त्यस्तै उनले आफ्नो १९ औँ सत्याग्रहमा भएका सम्झौता यथाशीघ्र कार्यान्वयन गर्न समते अग्रह गरेका छन्। केसीले आफूसँग पटकपटक भएको सम्झौता कार्यान्वयन भइदिएको भए आज कोरोना उपचारमा थप बल पुग्ने बताए।
प्रेस विज्ञप्ति
म कोभिड-१९ बाट संक्रमित भएपछि प्रधानमन्त्री केपी शर्मा ओलीले दिनुभएको स्वास्थलाभको शुभकामना सन्देशको लागि हार्दिक धन्यवाद दिन चाहन्छु। सरकारले मेरो उपचार खर्च बेहोर्छु भनेको सन्दर्भमा भने मेरो उपचार खर्च म आफैँ बेहोर्छु बरु सरकारले आफ्ना नागरिकप्रतिको कर्तव्य पूरा गरोस्।
कोरोना संक्रमित विपन्न र दूरदराजका नागरिक जसलाई निःशुल्क उपचार आवश्यक छ उनीहरुले अहिलेसम्म उपचार पाउन सकेका छैनन्। त्यसो हुनाले अझै पनि सरकारको ध्यान व्यक्ति विशेषको उपचार खर्च बेहोर्नु भन्दा सबै विपन्न नागरिकको उपचार खर्च बेहोर्नेमा हुनुपर्दछ।
हामीसँग पटक पटक गरिएका सम्झौता कार्यन्वयन भएको भए देशका दूरदराजदेखि सबै भेगमा ठूला सरकारी अस्पताल, मेडिकल कलेज बन्ने थिए। साथै, त्यहाँका नागरिकले कोरोना साथसाथै सम्पूर्ण रोगहरुको गुणस्तरीय, निःशुल्क, सर्वसुलभ स्वास्थ सेवा पाउने थिए।
तसर्थ हामीसँग १९ औँ सत्याग्रहमा भएका सम्झौता यथाशीघ्र कार्यन्वयन गर्नुहुन अनुरोध गर्दछु। मेरो स्वास्थ्य लाभको कामना गर्नुभएकोमा फेरि पनि तपाईंलाई धन्यवाद दिन चाहन्छु।
डा गोविन्द केसी
२०७७/०७/२९
त्रिभुवन विश्वविद्यालय शिक्षण अस्पताल, महाराजगञ्ज
