काठमाडौं– अन्तर्राष्ट्रिय मैत्रीपूर्ण फुटबल सिरिजको दोस्रो खेलमा नेपाल र बंगलादेश भिड्दैछन्। खेल नेपाली समयअनुसार साँझ ४ः४५ बजे ढाकास्थित बंगबन्धु रंगशालामा शुरु हुनेछ।
सिरिजको पहिलो खेलमा बंगलादेशसँग २–० गोलले स्तब्ध बनेको नेपाल दोस्रो खेलमा जित निकाल्दै सिरिजमा पुनरागमन गर्ने लक्ष्यमा रहको छ। सिरिजमा फर्कनको लागि नेपालले मंगलबारको खेलमा बंगलादेशलाई कम्तीमा पनि २–० गोलअन्तरले पराजित गनुपर्नेछ। नेपालले २–० ले खेल जितेमा सिरिजको विजेता टाइब्रेकरले निर्धारण गर्नेछ।
यदि नेपालले खेल २ गोलको अन्तरले जित्न नसकेको अवस्थामा सिरिजको उपाधि गुमाउनेछ। खेलअघि बोल्दै नेपाली टोलीका प्रशिक्षक बाल गोपाल महर्जनले पहिलो खेलमा गरिएका गल्तीहरु सुधारिने पर्ने बताएका छन्। उनले टोली दोस्रो खेलमा लागि तयार रहेको जानकारी दिए।
खेलको प्रत्यक्ष प्रसारण बंगलादेशको टी स्पाेर्ट्सले गर्नेछ।
