सत्तारुढ नेकपाका युवा नेता तथा अनेरास्ववियूका संयोजक ऐन महरले प्रधानमन्त्री केपी शर्मा ओलीपछि सरकार र पार्टीको नेतृत्व दोश्रो पुस्तामा लानु पर्ने बताएका छन्।
संयोजक महरले बिहीबार बिहान सामाजिक सञ्जालमार्फत् धारणा राख्दै पहिलो पुस्ताको नेतृत्वले परिवर्तनको सफल नेतृत्व गरेको र एउटै पुस्तामा पटक–पटक परीक्षण भइसकेका नेताहरूबाट परिवर्तन र समृद्धिको नेतृत्व सम्भव नभएको बताएका हुन्।
अब नेतृत्वको पुस्तान्तरण गरौं भन्ने ओलीको विचारलाई बुधबार बालुवाटारमा बसेको नेकपाको सचिवालय बैठकमा महासचिव विष्णु पौडेलले औपचारिक रुपमा प्रवेश गराएको महरको भनाइ छ।
‘कामरेड महासचिवलाई यो क्रान्तिकारी विचारलाई बैठकमा दर्ज गराउनु भएकोमा हार्दिक धन्यवाद व्यक्त गर्दछु, पहिलो पुस्ताको नेतृत्वले परिवर्तनको सफल नेतृत्व गरेको र एउटै पुस्तामा पटक–पटक परीक्षण भइसकेका नेताहरूबाट परिवर्तन र समृद्धिको नेतृत्व सम्भव नभएकाले केपी ओलीपछिको पार्टी र सरकारको नेतृत्व दोस्रो पुस्तामा लैजानु अबको अनिवार्य आवश्यकता हो,’ महरले भनेका छन्।
समृद्धि र विकासको पथमा सरकार लम्किरहेका बेला अनावश्यक बहस सिर्जना गर्नु तर्कसंगत नहुने धारणा महरले राखेका छन्।
बिरामी हुँदा नै स्थानीय तहमा नेकपा एमालेलाई एक नम्बर पार्टी बनाउने, नेकपा एमाले र नेकपा माओवादीलाई विघटन गरी नेकपा बनाउने र बिरामी हुँदा नै नेकपालाई एक नम्बर पार्टी बनाउने सर्वोच्च कमाण्डर ओली नै रहेको महरको भनाइ छ।
‘त्यो बेला बिरामी नदेख्नेहरू अहिले ओलीलाई बिरामी देख्न थालेछन्, यो देश कसैले बनाउछ भने त्यो केपी ओलीले बनाउने हो, अरु टेस्टेडहरू ओलीको प्रतिस्पर्धी हुन सक्दैनन्,’ महरले भने।
