काठमाडौं – निकिशा श्रेष्ठमाथि दुर्व्यवहार गरेको भिडियो टिकटकमा अपलोड गर्ने एक जना पक्राउ परेका छन्। पक्राउ पर्नेमा भक्तपुर नगरपालिका – २ टौमढीका विशेष जोशी रहेका छन्। नेपाल प्रहरीको साइबर ब्युरोले उनलाई बिहीबार बिहान पक्राउ गरेको हो।
निकिशामाथि भक्तपुरमा दुर्व्यवहार भएको भिडियो सामाजिक सञ्जालमा भाइरल भएपछि चर्को विरोध भएको थियो। विरोधपछि नेपाल प्रहरीको केन्द्रीय कार्यालयले साइबर ब्युरोलाई छानविन र अनुसन्धान गर्न पत्राचार गरेको थियो।
सार्वजनिक भएको भिडियोमा निकिशामाथि अपमानजनक शब्द प्रयोग गरी दुर्व्यवहार गरिएको देखिएको छ। आफूलाई दुर्व्यवहारभएपछि श्रेष्ठले ती मानिसलाई लखेटेकी छन्। यसबारे प्रहरीले थप अनुसन्धान गरिरहेको छ।
