निजी क्षेत्रको छाता संगठन नेपाल उद्योग वाणिज्य महासंघ (एफएनसीसीआई) को चुनावका लागि उम्मेदवारहरुको अन्तिम नामावली प्रकाशन भएको छ। महासंघको निर्वाचन समितिले शुक्रबार सार्वजनिक गरेको सूचीअनुसार ६३ सिटका लागि १ सय २७ जनाको उम्मेदवारी परेको छ।
मूख्य निर्वाचन अधिकृत उमेन्द्र केशरी न्यौपाने, निर्वाचन अधिकृतद्वय लिलामणि पौडेल र रमणकुमार कर्णले उम्मेदवारहरुको अन्तिम नामावली ससार्वजनिक गरेका हुन्। वैधानिक व्यवस्थाअनुसार हालका वरिष्ठ उपाध्यक्ष शेखर गोल्छा स्वतः अध्यक्ष बन्नेछन् भने अन्य पदहरुमा निर्वाचन हुनेछ।
त्यस्तै, महासंघको केन्द्रीय सदस्यमा प्रदेश १ बाट राजेन्द्र राउत र द्विराष्ट्रिय उद्योग वाणिज्य संघका तर्फबाट सन्दीप अग्रवाल निविर्राध निर्वाचित भएका छन्। महासंघको वरिष्ठ उपाध्यक्षका लागि महासंघका वर्तमान उपाध्यक्षद्वय चन्द्र ढकाल र किशोर प्रधान बीच प्रतिस्पर्धा हुँदैछ।
त्यसैगरी, महासंघको वस्तुगत उपाध्यक्षमा वर्तमान उपाध्यक्ष उमेशलाल श्रेष्ठ र अञ्जन श्रेष्ठ, एशोसिएट उपाध्यक्षमा रामचन्द्र संघई र शौरभ ज्योति र जिल्ला नगर उपाध्यक्षमा दिनेश श्रेष्ठ र गुणनिधि तिवारीको उममेदवारी परेको छ।
कोरोना महामारीका कारण स्थगित भएको महासंघको ५४ औं वाषिर्क साधारणसभा तथा निर्वाचन आगामी मंसिर ११, १२ र १३ गते काठमाडौंमा हुँदैछ।
