भारतको उत्तरप्रदेशमा सडक दुर्घटनामा परी १४ जनाको मृत्यु भएको छ। मृतकमध्ये ६ जना बालबालिका रहेका छन्। उत्तरप्रदेश राज्य प्रहरी स्रोतका अनुसार मृतकमध्ये १२ जना एकै गाउँका रहेका छन्।
बिहीबार राति जन्ती बोकेर फर्किएको बोलेरो जीप मानिकपुर थानाको देशराज क्षेत्रमा ट्रकसँग ठोक्किँदा उक्त दुर्घटना भएको हो। शेखपुर गाउँमा विवाहको जन्ती गई फर्किएका मानिस उक्त बोलेरो जीपमा सवार थिए।
बोलेरो जीपका चालकको लापरवाहीले दुर्घटना भएको प्रहरीको प्रारम्भिक अनुसन्धानमा देखिएको छ। दुर्घटनाका सम्बन्धमा थप अनुसन्धान गर्न प्रशासनीय अधिकारीहरू जुटेका छन्।
