भारतको केन्द्रीय राजधानी रहेको दिल्लीमा मात्रै कोरोना भाइरसबाट एकैदिनमा कम्तीमा १ सय १८ जनाको मृत्यु भएको छ।
दिल्ली प्रदेश सरकारले प्रकाशित गरेको स्वास्थ्य बुलेटिनमा दिल्लीमा मात्रै कुल आठ हजार १ सय ५९ जनाको मृत्यु भएको उल्लेख गरिएको छ।
सरकारी अधिकारीहरूले शुक्रबार दिएको जानकारीअनुसार दिल्लीमा कोरोनाका कारण अहिलेसम्म सङ्क्रमित भएकाहरुको कुल संख्या पाँच लाख १७ लाख २ सय ३८ पुगेको छ।
पछिल्लो २४ घण्टामा कुल सङ्क्रमितको संख्या ६ हजार ६ सय ८ रहेको अधिकारीहरूले जानकारी दिएका छन्।
कुल सङ्क्रमितमध्ये अहिलेसम्म चार लाख ६८ हजार १४३ जना सङ्क्रमणमुक्त भएका छन्। तीमध्ये पछिल्लो २४ घण्टामा ८ हजार ७ सय ७५ जना सङ्क्रमणमुक्त भएका छन्।
भारतको केन्द्रीय राजधानीमा अहिले पनि ४० हजार ९३६ जना सङ्क्रमित अवस्थामै रहेका छन्।
दिल्ली स्वास्थ्य विभागले पछिल्लो २४ घण्टामा ६२ हजार ४२५ जनाको कोरोना परीक्षण गरिएको जानकारी दिएको छ।
भारतको दिल्लीमा केही समययता कोरोनाभाइरसको सङ्क्रमण न्युन देखिए पनि अहिले पछिल्लो समयमा फेरि बृद्धि भएको छ।
तीव्र रुपमा फैलिएको कोरोनाभाइरसको महामारी नियन्त्रणका लागि घर घरमा सर्वेक्षण तथा परिक्षण गर्ने क्रमलाई पनि तीव्रता दिएको अधिकारीहरुले बताएका छन्।
त्यसैगरी सार्वजनिक स्थलमा रहेका बेला मास्क नलगाउनेहरुलाई दुइ हजार जरिवाना तिराउने निर्णय पनि प्रदेश सरकारले गरेको छ।
यसअघि पाँच सय रुपैया मात्रै रहेको जरिवानालाई एकाएक बृद्धि गरेर दुई हजार बनाइएको हो। त्यस बाहेक अन्य पनि धेरै प्रयासहरू भइरहेको मुख्यमन्त्री अरविन्द केजरीवालले जानकारी दिएका छन्।
