अभिनेता सुुशान्त सिंह राजपूत आत्महत्या प्रकरणपछिको अनुसन्धानले बलिउडमा विद्यमान ड्रग्स कारोवारलाई उदाङ्गो बनाइदियो। एनसीबीले ड्रग्स कनेक्सनमा गम्भीर अनुसन्धान शुरु गरेसँगै बलिउड सेलिब्रेटीहरु धमाधम पक्राउ पर्न थाले।
ड्रग्ससँग नाम जोडिने बित्तिकै एनसीबीले एकाएक बलिउडकर्मीको घरमा छापा मार्ने र उनीहरुलाई सोधपुछ गर्ने काम गरिरहेको छ। ड्रग्स केसमा नाम जोडिएका बलिउड सेलिब्रेटीबारे यहाँ चर्चा गराैं।
सुुशान्त सिंह राजपूतको आत्महत्याबारे छानबिन गर्ने क्रममा एनसीबीले अभिनेत्री रिया चक्रवर्तीलाई पक्राउ गर्याे। रियाले शुरुवातमा ड्रग्स लिने गरेको कुरा अस्वीकार गरेकी थिइन्।
त्यसपश्चात् यस केसमा अन्य बलिउडकर्मीको नाम जोडिँदै गयो। ड्रग्स कनेक्सनमा अभिनेत्री दीपिका पादुकोणको नाम जोडिएपछि बलिउडमा हंगामा मच्चिएको थियो। दीपिका र उनकी म्यानेजर करिश्मा प्रकाशबीच व्हाट्सएप च्याटमा कोड भाषाको प्रयोग गरी ड्रग्स लिनेबारे कुरा भएको खुलाशा भयो।
त्यस्तै, ड्रग्स केसमा जोडिन आइपुगेकी अर्की अभिनेत्री हुन् श्रद्धा कपूर। सुशान्तको फार्महाउसमा हुने पार्टीमा श्रद्धा सहभागी हुने गरेको खबर बाहिरियो। एनसीबीले यसबारे श्रद्धासँग सोधपुछ गर्याेतर, उनले ड्रग्स लिने गरेको अस्वीकार गरिन्।
सुशान्तको फार्महाउसमा हुने पार्टीमा सारा अली खान पनि सहभागी हुने गरेको खबर पाएपछि एनसीबीले उनीसँग सोधपुछ गर्याे। साराले ड्रग्स लिने कुरा अस्वीकार गरिन् र एनसीबीले उनलाई छोडिदियो।
सोधपुछ दौरान रियाले अभिनेत्री राकुल प्रित सिंहको नाम लिएकी थिइन्। त्यसपछि एनसीबीले राकुल प्रितसँग सोधपुछ गरेको थियो। त्यसक्रममा राकुलले ड्रग्स सेवन नगर्ने बताएपछि उनलाई छोडिएको थियो।
ड्रग्स कनेक्सनमा जोडिएको अर्को ठूलो नाम हो अर्जुन रामपाल। अभिनेता रामपालको लिव इन पार्टनर गैब्रिएला डेमेट्रिएड्सका भाइलाई एनसीबीले पक्राउ गरेपछि रामपालका नाम यस केसमा जोडिएको थियो। एनसीबीले रामपालको घरमा छापा मार्नुको साथै उनीसँग सोधपुछ गरेको थियो।
अर्जुन रामपालकी लिव इन पार्टनर गैब्रिएला डेमेट्रिएड्स पनि ड्रइस केसमा परेकी थिइन्। उनका भाइले ड्रग्सको कारोवार गर्ने भन्दै एनसीबीले नियन्त्रणमा लिएपछि यस कुराको खुलाशा भएको थियो।
यति मात्रै होइन, टिभी अभिनेत्री अबीगेल पाण्डे र उनका ब्वाइफ्रेण्ड सनम जोहर पनि यस केसमा मुछिएका छन्। उनीहरु दुबैले गाँजा सेवन गर्ने गरेको एनसीबीले जानकारी दिएको छ।
हाल ड्रग्स केसमा कमेडि ‘क्वीन’ भारती सिंह र उनका पति हर्ष लिंबाचियाको नाम जोडिएको छ। एनसीबीले भारतीको घरमा छापा मारी गाँजासहित भारती र उनको पतिलाई नियन्त्रणमा लिएको छ। उनीहरु दुबै अहिले न्यायिक हिरासतमा छन्।
