कोरोना महामारीका कारण महिनौंसम्म स्थगित भएको कक्षा १२ को परीक्षा मंगलबारबाट शुरु भएको छ। पहिलो दिनको परीक्षा पूर्ण सर्तकताका साथ सकिएको शिक्षा मन्त्रालयले जानकारी दिएको छ।
यसैबीच मोरङमा बाबुको किरिया बसेका एक युवकले पनि कक्षा १२ को परीक्षा दिएका छन्। बाबुको किरिया बसिरहेका मोरङ बेलबारी– ९ पोखरीया घर भएका आभाष पाण्डेले परीक्षा दिएका हुन्।
मेरिल्याण्ड कलेज विराटनगरका कक्षा १२ का नियमित समूहका विद्यार्थी पाण्डेले बेलबारी– ९ स्थित श्री काली माध्यमिक विद्यालयबाट परीक्षा दिएका हुन्। उनलाई छुट्टै परीक्षा हलमा राखी परीक्षा दिने व्यवस्था मिलाइएको श्री काली माध्यमिक विद्यालयका प्रधानाध्यापक नारायण कोइरालाले जानकारी दिएका छन्।
