प्रहरीले भक्तपुरको मध्यपुर ठिमी नगरपालिका– १ लोकन्थलीबाट जिउँदो सालकसहित २ जनालाई पक्राउ गरेको छ। पक्राउ पर्नेमा धादिङको शितली गाउँपालिका–३ झार्लाङ्दी घर भएका २७ वर्षीय ध्रुव बहादुर मगर र साेही ठाउँका ३१ वर्षीय भिम बहादुर मगर रहेका छन्।
उनीहरुलाई बुधबार दिउँसो नियन्त्रणमा लिएको प्रहरलिे जानकारी दिएको छ। उनीहरुबाट विभिन्न बैंकको चेक बुक, भौचर तथा एटिएम कार्ड, १ थान नागरिकता प्रमाणपत्र, पेन ड्राइभ, ३ थान राजश्व तिरेको बिल, ४ थान मोबाइल, भिम बहादुर थापाको सवारी चालक अनुमतिपत्र तथा सशस्त्र प्रहरी बलको परिचयपत्र प्रहरीले बरामद गरेको छ।
विशेष सूचनाको आधारमा महानगरीय प्रहरी परिसर भक्तपुरबाट खटिएको प्रहरीले उक्त सालक लिएर हिँडिरहेको अवस्थामा उनीहरुलाई पक्राउ गरेको हो। उनीहरुलाई थप अनुसन्धान तथा कारवाहीको लागि जिल्ला वन कार्यालय भक्तपुर पठाइने जिल्ला प्रहरी कार्यालय भक्तपुरले जानकारी दिएको छ।
