गुल्मीमा भएको सडक दुर्घटनामा ५ जनाको मृत्यु भएको छ। इस्मा गाउँपालिकामा भएको जीप दुर्घटनामा ५ जनाको मृत्यु भएको हो। अन्य २ जना गम्भीर घाइते भएका छन्।
जिल्ला प्रहरी कार्यालय गुल्मीका प्रमुख एसपी प्रविणलाल श्रेष्ठका अनुसार इस्मा–४ हुलमा लु१ज ११६६ नम्बरको जीप दुर्घटना हुँदा ५ जनाको घटनास्थलमै मृत्यु भएको हो।
शुक्रबार बिहान इस्मा गाउँपालिकाबाट सदरमुकाम तम्घास आउँदै गरेको जीप दुर्घटनामा परेको हो। जीपमा चालकसहित ९ जना थिए। जीप सडकबाट ४ सय मिटर तल भीरमा पसेकाे छ।
दुर्घटनामा इस्मा–४ हुलकै ६५ वर्षका डम्बर हितान, ३३ वर्षका शिव दर्लामी, ३० वर्षका वसन्त दर्लामी, ३३ वर्षका धनबहादुर अछामी र मालिका गाउँपालिका–५ का ८० वर्षकी सुन्दरी थापाको मृत्यु भएको हो।
इस्मा–४ हुलकै १९ वर्षका पर्शुराम थापा, २८ वर्षकी सरस्वती दर्लामी र सहचालक २५ वर्षका कमल हितान घाइते भएको प्रहरीले बताएको छ।
चालक बुद्ध बस्नेत र सहचालकलाई प्रहरीले नियन्त्रणमा लिएको छ। घाइतेहरूलाई उपचारका लागि जिल्ला अस्पताल पठाइएको छ।
