एकदिवसीय क्रिकेट सिरिजको पहिलो खेलमा भारतमाथि अष्ट्रेलियाले शानदार जीत पारेको छ। शुक्रबार भएको खेलमा अष्ट्रेलियाले भारतलाई ६६ रनले पराजित गरेको हो।
अष्ट्रेलियाले दिएको ३ सय ७५ रनको लक्ष्य पछ्याएको भारतले निर्धारित ५० ओभरमा ८ विकेट गुमाउँदै ३ सय ८ रन मात्र बनाउन सक्यो। भारतको लागि हार्दिक पाण्डेयले ७६ बलमा ९० रनको योगदान दिए। उनले ७ चौका र ४ छक्का प्रहार गरेका थिए।
त्यस्तै, शिखर धवनले ८६ बलमा ७४ रन, नाभदीप सैनीले २९ रविन्द्र जडेजाले २५, मयंक अग्रवालले २२, कप्तान विराट कोहलीले २१ रन बनाए।
अष्ट्रेलियाको बलिङमा आडम जाम्पाले ४ विकेट लिए। उनले १० ओभरमा ५४ रन खर्चिएका थिए। अर्का बलर जोश हज्लेउडले ३ विकेट लिए। त्यस्तै, मिचेल स्टार्कले एक विकेट हात पारे।
त्यसअघि पहिले ब्याटिङ गरेको अष्ट्रेलियाले निर्धारित ५० ओभरमा ६ विकेट गुमाउँदै ३ सय ७४ रन बनाएको थियो। अष्ट्रेलियाको पारीमा कप्तान आरोन फिन्च र स्टेभेन स्मिथले शतकीय पारी खेलेका थिए।
फिन्चले १ सय २४ बलमा १ सय १४ रनको योगदान दिए। स्मिथले विस्फोटक ब्याटिङ गर्दै ६६ बलमा १ सय ५ बनाए। त्यस्तै, ओपनर ब्याट्सम्यान डेविड वार्नरले ७६ बलमा ६९ रन ग्लेन म्याक्सवेलले १९ बलमा ४५ रन बनाए।
भारतको बलिङमा मोहम्मद शामिले ३ विकेट लिए। उनले १० ओभरमा ५९ रन खर्चिएका थिए। त्यस्तै, युभेन्द्र चाहल र जसप्रित बुम्राह र नाभदीप सैनिले समान एक एक वकेट लिए।
यस जीतसँगै ३ खेलको सिरिजमा भारतविरुद्ध अष्ट्रेलिया १–० ले अघि बढेको छ। सिरिजको दोस्रो खेल नोभेम्बर २९ र तेस्रो खेल डिसेम्बर २ मा हुनेछ।
