पेरिस सेन्ट जर्मन (पीएसजी) का स्टार नेयमार जुनियरले पुनः बार्सिलोनाका कप्तान लियोनल मेसीसँगै फुटबल खेल्न चाहेको बताएका छन्।
बार्सिलोनामा ४ सिजन बिताएर विश्व कीर्तिमानी रकममा पीएसजी गएका नेयमारले नयाँ सिजनमा पूर्व सहकर्मी मेसीसँगै फुटबल खेल्ने चाहाना व्यक्त गरेका हुन्। पीएसजी र म्यानचेस्टर युनाइटेडको च्याम्पियन्स लिगको समूह चरण खेलपछि बोल्दै नेयमारले मेसीसँग यस्तो बताएका हुन्।
‘पुनः मेसीसँगै खेलेर रमाउने मेरो चाहाना छ,’ नेयमारले भने, ‘मलाइ लाग्छ, हामीले अर्को सिजन सँगै खेल्नुपर्छ।’ बुधबार राति भएको च्यापियन्स लिगको खेलमा पीएसजीले नेयमारको २ गोल मद्धतमा म्यानचेस्टर युनाइटेडलाई ३–१ गोलले पराजित गरेको थियो।
मेसी र नेयमार मिल्ने साथी हुन्। बार्सिलोना छोडेर गएपछि नेयमारलाई क्याम्प नोउमा फर्काउने प्रयास गरिएको थियो। उनलाई फर्काउन मेसीले लगातार प्रयास गरेपनि असफल भएका थिए।
अर्को सिजन मेसी बार्सिलोनामा रहन्छन् वा रहँदैनन् भन्ने द्विविधा रहेको छ। यस्तोमा मेसी र नेयमारको पुनर्मिलन कुन क्लबमा होला भन्ने चर्चा शुरु भएको छ।
