अन्तर्राष्ट्रिय टी–२० क्रिकेट सिरिजको दोस्रो खेलमा अष्ट्रेलियाले भारतलाई १ सय ९५ रनको लक्ष्य दिएको छ। पहिले ब्याटिङ गरेको अष्ट्रेलियाले निर्धारित २० ओभरमा ५ विकेट गुमाउँदै १ सय ९४ रन बनाएको हो।
अष्ट्रेलियाको लागि म्याथ्यु वाडेले ३२ बलमा ५८ रन तथा स्टिभ स्मिथले ३८ बलमा ४६ रनको योगदान दिए। त्यस्तै, ग्लेन म्याक्सवेलले २२ रन, मोइसेस हेनरीक्वीसले २६ रन, मार्कस स्टोइनिसले १६ रन बनाए।
भारतको बलिङमा टी नटरजनले २ विकेट लिए। त्यसैगरी शार्दुल ठाकुर, युभेन्द्र चाहालले समान एक–एक विकेट लिए।
सिरिजको पहिलो खेलमा विजयी भएको भारत दोस्रो खेलमा पनि जित निकाल्दै एक खेल अगावै सिरिज उपाधि जित्न चाहान्छ। त्यस्तै, बुधबारको खेलमा भारतलाई हराउँदै अष्ट्रेलिया सिरिजमा पुनरागमन गर्ने दाउमा छ।
सिरिजको पहिलो खेलमा भारतले अष्ट्रेलियालाई ११ रनले पराजित गरेको थियो। भारतले दिएको १ सय ६१ रनको लक्ष्य पछ्याएको अष्ट्रेलियाले निर्धारित २० ओभरमा १ सय ५० रन मात्र बनाएको थियो।
सिरिज उपाधिको आशा जीवितै राख्न अष्ट्रेलियालाई आजको खेल जित्नैपर्ने दबाब छ। उता, एकदिवसीय सिरिज उपाधि गुमाएको भारत टी–२० सिरिज उपाधि जित्दै बदला लिने दाउमा छ।
