प्रजातन्त्र सेनानी श्यामलाल श्रेष्ठ, जसले नेपालको राजनीतिक आन्दोलनमा निष्ठा र त्यागको बाटो देखाए। कांग्रेसलाई जनताको पार्टीका रुपमा स्थापित गर्न र नागरिकको स्वतन्त्रता, हक र अधिकारका लागि सदा आफूलाई समर्पित गरेका श्रेष्ठ अब सम्झनामा मात्रै बाँकी रहेका छन्।
अपितु, नेता श्रेष्ठ बलिदानीपूर्ण संघर्षका गाथा अमर र प्रेरणाका रुपमा आगामी पुस्ताले ग्रहण गर्ने नै छ। हो, नेपाली कांग्रेसका पूर्व केन्द्रीय सदस्य तथा प्रजातन्त्र सेनानी श्यामलाल श्रेष्ठको ८० वर्षको उमेरमा निधन भएको छ।
मस्तिष्कमा रक्तश्राव भई उपचाररत श्रेष्ठको काठमाडौं मोडल अस्पतालमा शुक्रबार निधन भएको हो। कांग्रेसका महाधिवेशन प्रतिनिधि रहेका प्रजातन्त्र सेनानी श्रेष्ठको निधनको खबर लोकतन्त्रप्रति विश्वास गर्ने तमाम नेपालीलाई शोकाकुल बनाएको छ।
स्वर्गीय श्रेष्ठ पार्टीको एघारौं महाधिवेशन २०६२ मा गिरिजाप्रसाद कोइरालाको सभापतित्वकालमा पार्टीको केन्द्रीय सदस्यमा निर्वाचित भएका हुन्। वि.सं. २०१८ सालमा निरंकुश पञ्चायती व्यवस्थाको विरोध गर्दै भएको क्रान्तिका क्रममा बमकाण्डमा पक्राउ परेका थिए।
नेपालमा प्रजातन्त्र स्थापनार्थ भएका आन्दोलन र संघर्षका क्रममा श्रेष्ठले ११ वर्षभन्दा बढी समयसम्म जेल जीवन बिताएका थिए। ३० वर्ष लामो प्रजातान्त्रिक आन्दोलनमा सक्रिय रहेर बहुदलीय व्यवस्थाको स्थापनाका निमित्त विशिष्ट योगदान गर्ने र त्यस आन्दोलनमा सक्रिय भएका कारण पञ्चायती व्यवस्थाको दमन र प्रतिशोधमा परेका राजनीतिक पीडितहरूलाई सम्मान गर्नका लागि नेपाल सरकारबाट सन्त नेता कृष्णप्रसाद भट्टराईको संयोजकत्वमा गठन भएको राजनीतिक पीडित समितिको सदस्य भएर श्रेष्ठले काम गरे।
श्रेष्ठ २०५१ सालको मध्यावधि निर्वाचनमा काठमाडौं निर्वाचन क्षेत्र नं. ३ बाट पार्टीका तर्फबाट उम्मेदवार र २०५६ सालमा नेपाली कांग्रेस जिल्ला कार्यसमिति, काठमाडौंको सभापति भएर काम गरे।
श्रेष्ठ राजनीतिका साथै सामाजिक क्षेत्रमा समेत सक्रिय रहँदै आएका थिए। वि.सं. २०७२ मा उनलाई जननायक बीपी कोइराला स्मृति ट्रष्टद्वारा बीपी सेनानी सम्मानबाट विभुषित गरिएको थियो।
स्वर्गीय श्रेष्ठको एक छोरा र तीन छोरी छन्। लोकतन्त्रका लागि आफूलाई उत्सर्ग गर्न पनि पछि नपर्ने अत्यन्त सरल र शालिन व्यक्तित्व श्यामलाल श्रेष्ठको निधनप्रति नेपाली कांग्रेस गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ।
नेपाली कांग्रेसका मुख्य सचिव कृष्णप्रसाद पौडेलले शोक वक्तव्य जारी गरी श्रेष्ठको आत्माको चीर शान्तिको कामना गर्दै सबै शोक सन्तप्त परिवारजनमा हार्दिक समवेदना प्रकट गरेका छन्।
स्वर्गीय श्रेष्ठप्रति सम्मान प्रकट गर्दै शोक कार्यक्रम पनि कांग्रेसले सार्वजनिक गरेको छ। २०७७ मंसिर २६, २७ र २८ गते तीन दिनसम्म पार्टीको केन्द्रीय कार्यालय र सबै जिल्ला कार्यालयहरुमा पार्टीको झण्डा आधा झुकाउने कार्यक्रम रहेको छ।
मंसिर २८ गते आइतबारका केन्द्र तथा जिल्लाका सबै कार्यालयहरू बन्द गर्ने, स्वर्गारोहणको १३ औं दिनसम्म केन्द्रीय कार्यालय र सबै जिल्ला कार्यालयहरुमा शोक पुस्तिका राख्ने कार्यक्रम रहेको छ।
स्वर्गारोहणको १३ औं दिनमा सम्बन्धित जिल्ला काठमाडौंले भौतिक (सामाजिक) दुरी कायम गर्दै शोक सभाको आयोजना गर्ने कांग्रेसले जानकारी दिएको छ। र, मंसिर २९ गतेका लागि पूर्व निर्धारित ७७ जिल्लामा हुने विरोध प्रदर्शनको आन्तरिक तयारीसँग सम्बन्धित कार्यहरू सूचारु रहने मुख्य सचिव पौडेलले बताएका छन्।
