नेपाली कांग्रेसले केपी ओली नेतृत्वको सरकारविरुद्ध विशाल प्रदर्शन देशव्यापी रुपमा शुरु गरेको छ। काठमाडौं, ललितपुर र भक्तपुरमा पनि कांग्रेसको प्रदर्शन जारी छ।
केपी ओली नेतृत्वको सरकार भष्ट्राचार, कुशासन, अधिनायकवाद र सर्वसत्तावादतर्फ उन्मुख भएको ठहर गर्दै नेपाली कांग्रेसले देशव्यापी विरोध प्रदर्शन गरेको हो।
कांग्रेस सभापति शेरबहादुर देउवा र प्रवक्ता विश्वप्रकाश शर्मा हेटौंडामा हुने कार्यक्रमलाई सम्बोधन गर्न त्यहाँ पुगिसकेका छन्। वरिष्ठ नेता रामचन्द्र पौडेलले काठमाडौं, उपसभापति विमलेन्द्र निधिले भक्तपुर, महामन्त्री शशांक कोइरालाले विराटनगर र कोषाध्यक्ष सीतादेवी यादवले ललितपुरको कार्यक्रमलाई सम्बोधन गर्दै छन्।
यस्तै, सहमहामन्त्री प्रकाशशरण महत झापा, पूर्व उपसभापति गोपालमान श्रेष्ठ काभ्रे, पूर्वमहामन्त्री प्रकाशमान सिंह धनुषाको कार्यक्रममा सहभागी भएका छन्।
पूर्वमहामन्त्री कृष्णप्रसाद सिटौला महोत्तरी, चित्रलेखा यादव सप्तरी, रामशरण महत चितवन र अर्जुननरसिंह केसी पोखरामा हुने कार्यक्रममा सहभागी हुने भएका छन्।
केन्द्रीय सदस्यहरू गगन थापा कैलाली, प्रदीप पौडेल कञ्चनपुर र एनपी साउद अछाम पुगेका छन्। त्यसैगरी, नेता रामहरि खतिवडा इलाम गएका छन्।
