यूईएफए च्याम्पियन्स लिगको अन्तिम १६ को ड्र सम्पन्न भएको छ। यसपटक प्रि –क्वाटरफाइनलमा क्याटलान क्लब बार्सिलोना र पिएसजीको महाभिडन्त हुने भएको छ।
त्यस्तै स्पेनिस च्याम्पियन रियल म्याड्रिड र इटालियन टोली एटलान्टाले क्वाटरफाइनलमा स्थान बनाउन एक अर्काकाे सामना गर्नेछन्। च्याम्पियन्स लिगको साविक विजेता बायर्न म्युनिखले इटालियन टोली लाजियोको सामना गर्नेछ।
इंग्लिस क्लब म्यानचेस्टर सिटी र जर्मन क्लब बोरुसिया मोन्चेनग्लाडबाकबीच प्रतिस्पर्धा हुनेछ। प्रिमियर लिगको च्याम्पियन लिभरपुलले गत सिजन सेमिफाइनलमा पुगेको आरबी लाइप्जिगसँग खेल्नेछ। चेल्सीले ला लिगाको शीर्षस्थानमा रहेको एट्लेटिको मड्रिडको सामना गर्नेछ।
जर्मन क्लब बोरुसिया डर्टमुन्डले युरोपा लिगको साविक विजेता सेभियासँग प्रतिस्पर्धा गर्नेछ। इटालियन च्याम्पियन युभेन्टसले पोर्चुगीज क्लब एफसी पोर्टोसँग खेल्नेछ। प्रि–क्वाटरफाइनल खेलहरु फेब्रुअरी तेस्रो सातादेखि सुरु हुनेछ।
