क्याटलान क्लब बार्सिलोनाका डिफेन्डर जोर्डि अल्बाले लिग लिडर रियल सोसिडाडविरुद्ध बार्सिलोनाले यस वर्षकै उत्कृष्ट खेल खेलेको बताएका छन्। बुधबार राति भएको खेलमा बार्सिलोनाले रियल सोसिडाडलाई २–१ गोलले पराजित गरेको थियो।
डिफेन्डर अल्बाले सोसिडाडविरुद्ध बार्सिलोनाले २०२० कै राम्रो प्रदर्शन गरेको बताएका हुन्। ‘यो वर्षकै उत्कृष्ट खेल हो,’ अल्बाले भने, ‘टोलीको प्रयास र खेलप्रति म निकै खुशी छु।’
‘सोसिडाडले खेल खेल्ने तरिका बदलेको थियो। सोसिडाड ला लिगाको उत्कृट टिममध्येको एक हो। राम्रो टिमसँगको खेल कठिन हुन्छ भनेर हामीलाई थाहा थियो,’ उनले थपे, ‘टिमको लागि योगदान दिन पाउँदा म उत्साहित छु।’
‘उनीहरुले गोल गर्नेबित्तिकै हामी गोल फर्काउन सफल भयौं। टिमले उत्कृष्ट खेल खेल्यो। हामीले वास्तविक बार्सिलानालाई महसुु ग¥यौं। प्रत्येक बलका लागि लडिरहेको बार्सिलोना,’ उनले बताए।
२५ वर्ष यताकै खराब अवस्थाबाट गुज्रिरहेको बार्सिलोना जारी सिजन घरेलु लिगमा उत्कृष्ट प्रदर्शन गर्न संघर्ष गरिरहेको छ। सोसिडाडविरुद्धको खेलमा बार्सिलानाका खेलाडीबीच उत्कृष्ट तालमेल मिलेको थियो। घरेलु मैदानमा पछि परेको अवस्थालाई उल्टाउँदै बार्सिलोनाले जित निकालेको थियो।
बार्सिलोनाका लागि जोर्डि अल्बा र फ्रेङ्की डि जोङले गोल गरेका थिए भने रियल सोसिडाडका लागि विलियन जोसेले गोल गरे। सोसिडाडविरुद्धको खेलमा बार्सिलोनाले १४ सट प्रहार गरेको थियो। तीमध्ये ४ सट ‘अन टार्गेट’ थिए। बलमा ५४ प्रतिशत पकड जमाएको बार्सिलोनालाई यस जितले केही राहत मिलेको छ।
जितसँगै बार्सिलोना अंक तालिकोको पाँचौं स्थानमा उक्लिएको छ। बार्सिलोनाको १२ खेलबाट २० अंक छ। सोसिडाड १४ खेलबाट २६ अंक जोड्दै तालिकाको दोस्रो स्थानमा छ। ११ खेलबाट २६ अंक बटुलेको एथ्लेटिको मड्रिड शीर्षस्थानमा रहँदा १३ खेलबाट २६ अं जोडेको रियल मड्रिड तेस्रो स्थानमा छ।
