मन्त्रिपरिषद् बैठक आज बस्ने भएको छ। प्रधानमन्त्री केपी शर्मा ओलीले बिहीबार साँझ ६ बजेका लागि मन्त्रिपरिषद् बैठक बोलाएका हुन्। प्रधानमन्त्री सरकारी निवास बालुवारमा बस्ने बैठकमा अध्यादेश खारेजी लगायतका एजेण्डामा छलफल हुने एक मन्त्रीले जानकारी दिए।
सरकारले ल्याएको संवैधानिक परिषद् (काम, कर्तव्य, अधिकार र कार्यविधि) सम्बन्धी अध्यादेशको चौतपर्ली विरोधपछि बुधबार सत्तारुढ नेपाल कम्युनिष्ट पार्टी (नेकपा) अध्यक्ष एवं प्रधानमन्त्री ओलीले फिर्ता लिने सहमति गरेका थिए।
सो अध्यादेश खारेजीका लागि अर्को अध्यादेश जारी गर्नुपर्ने प्रावधान रहेकाले सो विषयमा निर्णय गर्न मन्त्रिपरिषद् बैठक बस्न लागेको बताइएको छ।
बुधबार बसेको नेकपा स्थायी कमिटी बैठकले सो अध्यादेश फिर्ता लिन सरकारलाई निर्देशन दिएको थियो। स्थायी कमिटी बैठक अघि प्रधानमन्त्री ओली र अध्यक्ष पुष्पकमल दाहाल प्रचण्डबीच भएको छलफल सो अध्यादेश फिर्ता गर्ने सहमति भएको थियो।
