पछिल्लो २४ घण्टामा थप ७ सय २२ जनामा कोरोना भाइरसको संक्रमण पुष्टि भएको छ। योसँगै नेपालमा कुल संक्रमितको संख्या २ लाख ५५ हजार २ सय ३६ पुगेको छ। स्वास्थ्य तथा जनसंख्या मन्त्रालयका अनुसार ७ हजार ७ सय २९ परीक्षण हुँदा ७ सय २२ जनामा संक्रमण पुष्टि भएको हो।
देशभर सक्रिय संक्रमितको संख्या ७ हजार ९२९ जना रहेको छ। पछिल्लो २४ घण्टामा कोरोना भाइरस संक्रमणमुक्त हुनेको संख्या ९ सय ६६ रहेको छ। हालसम्म संक्रमणमुक्त हुनेको संख्या २ लाख ४५ हजार ७०९ रहेको छ।
मन्त्रालयका अनुसार पछिल्लो २४ घण्टामा कोरोना भाइरस संक्रमणका कारण ३ जनाको मृत्यु भएको छ। हालसम्म मृतक संख्या एक हजार ७ सय ९८ रहेको छ।
