नवलपरासीको गैँडाकोट नगरपालिका–३ मा भिरबाट ट्रक खस्दा ३ जनाको मृत्यु भएको छ। कालीगण्डकी करिडोरको भोक्रोफाँटमा ट्रक भिरबाट खसेको थियो।
लोहनी कन्स्ट्रक्सनको सिमेन्ट बोक्ने ना ३ ख ५३३९ नम्बरको ट्रक दुर्घटना भएको हो। मृत्यु हुने तीन जना नै पुरुष रहेका प्रहरीले जानकारी दिएको छ।
ट्रक बुलिङटार गाउँपालिकाको खामबेंसीबाट फर्कदै गर्दा दुर्घटनामा परेको हो। ट्रक पहराबाट करिब एक सय मिटर तल खसेको छ। कालीगण्डकी करिडोरमै काम गर्ने ट्रक दुर्घटनामा परेको हो।
