नेपाल कम्युनिष्ट पार्टी (नेकपा) अध्यक्ष पुष्पकमल दाहाल प्रचण्डले पहिलेका संविधानमा प्रधानमन्त्रीलाई संसद् विघटनको अधिकार दिएको भए पनि अहिलेको संविधानमा त्यस्तो व्यवस्था नगरिएको बताएका छन्।
केपी ओली नेतृत्वको सरकारले संसद् विघटनका विरुद्धमा नेपाल कम्युनिष्ट पार्टी (नेकपा) ले काठमाडौं आयोजना गरेको विरोधसभालाई सम्बोधन गर्दै अध्यक्ष प्रचण्डले संसद् विघटन गर्ने अलोकतान्त्रिक कदमपछि ओलीले आफ्नो सरकार मात्रै विघटन गराएको बताएका हुन्।
प्रतिनिधिसभा विघटन नभएको उल्लेख गर्दै प्रचण्डले समय गल्ती सच्याउन ओलीलाई चेतावनी दिएका छन्। प्रतिगामीहरूलाई जनताले माफी नदिने उल्लेख गर्दै प्रचण्डले ओलीको संविधान विरोधी कदमको हिसाव जनताले खोज्ने बताए।
संविधान विरोधी कदमसँगै केपी ओलीले कलंकको टीका लगाएको उल्लेख गर्दै प्रचण्डले भने, ‘ओलीले मैले लोकतन्त्रमाथि घात गरे भनेर पश्चाताप गलत गरे भनेर माफी नमागेसम्म उनको कलंकको टीका पखालिँदैन।’
ओली गणतन्त्र विरोधी, संघीयताको विरोधी हो भन्ने पनि थाहा आफूलाई थाहा भए पनि ओलीले आफ्नो प्रवृत्ति सच्याउने अपेक्षा गरेको धारणा प्रचण्डले राखे।
‘ओली गणतन्त्र विरोधी, संघीयताको विरोधी हो भन्ने पनि थाहा थियो, तर ओलीले आफ्नो प्रवृत्ति सच्याउने विश्वास गरेँ, ओलीले संघीयता लोकतान्त्रिक गणतन्त्र मानिदिए भन्नुभएको थियो, तर उहाँ गणतन्त्र विरोधी, संघीयता विरोधी हुनुहुँदो रहेछ, त्यो अहिले प्रमाणित भयो,’ प्रचण्डले भने।
प्रचण्डले संघीय लोकतान्त्रिक गणतन्त्र स्थापनापछि ओलीलाई आफैले प्रधानमन्त्रीका लागि प्रस्ताव गरेको बताउँदै यो निर्णयमा गलत रहेको स्वीकार गरे। ‘क्षमायाचना माग्न चाहन्छु, संविधानमाथि प्रहार यति छिटो प्रहार हुन्छ भन्ने हामीले कहिल्यै सोचेका थिएनौं, जनतामाझ क्षमा माग्न चाहन्छु,’ प्रचण्डले भने।
प्रचण्डले ओली कम्युनिष्ट आदर्श, मूल्यमान्यता विपरीत र कम्युनिष्ट पार्टीको विचारबाट समेत स्खलित भएको उल्लेख गरे।
‘ओलीले आफूलाई लोकतन्त्रवादी भने पनि उहाँले जसरी प्रतिनिधिसभा विघटनको सिफारिस गर्नुभयो, यसबाट उहाँ लोकतन्त्रवादी होइन, उहाँ एउटा निरंकुश तानाशाह हो, जसले यो देशलाई भड्खालोमा हाल्न चाहेको छ भन्ने कुराको प्रमाणित भएको छ,’ प्रचण्डले भने।
