नेपाल कम्युनिष्ट पार्टी (नेकपा) अध्यक्ष पुष्पकमल दाहाल प्रचण्डले प्रधानमन्त्री केपी ओलीले ढाँटछल गरेर संसद् विघटन गरेको खुलासा गरेका छन्। नेकपाले काठमाडौंमा आयोजना गरेको विरोधसभालाई सम्बोधन गर्दै प्रचण्डले संविधानमाथि छलपूर्वक आक्रमण गरेको बताएका हुन्।
‘ओलीले स्वीकृती गरी नहाल्नु भन्छु, तर उता गए, छिटो गर है छिटो गर, यहाँ मलाई दबाब आउन थालिसक्यो भन्नुभएछ, यसबाट उहाँको मनस्थिति कति प्रतिक्रान्तिकारी दिशातर्फ गएको, संघीय लोकतान्त्रिक गणतन्त्रकाविरुद्ध प्रहार गर्न कति हतारो भएको भन्ने यसबाट प्रमाणित भयो,’ प्रचण्डले भने।
यो जीवनमरणको संघर्ष भएको उल्लेख गर्दै प्रचण्डले ओलीको असंवैधानिक कदमका विरुद्धमा सशक्त आन्दोलनको तयारीमा लाग्न अपील गरेका छन्।
‘म केपी ओलीजस्तो ढाँटछल गर्न जान्ने व्यक्ति होइन, हामी कोही पनि त्यस्ता छैनौं सीधा–सीधा कुरा हो, अन्तिम समयसम्म लड्छौं,’ प्रचण्डले भने, ‘तपाईहरू (भण्डारी–ओली) ले कति गर्न सक्ने हो गरे हुन्छ, हामी छोड्नेवाला छैनौं।’
संविधान घोषणालाई रोक्नका लागि देशी–विदेशी शक्तिले भूमिका खेलेको उल्लेख गर्दै प्रचण्डले संविधान जारी गरेको कतिपय प्रतिक्रियावादीहरूलाई मन नपरेको बताएका छन्।
कयौं अवरोधलाई पन्छाएर निर्वाचन र संविधान कार्यान्वयनको शुरुआत गरेको उल्लेख गर्दै प्रचण्डले अहिले आएर नेकपाकै एक अध्यक्ष केपी ओलीले प्रतिक्रान्तिकारीको गोटी भएकाले एक पटक निर्मम् संघर्षको तयारी गर्नुपरेको बताएका छन्।
