सगरमाथा प्रधानमन्त्री राष्ट्रिय महिला टी–२० क्रिकेट प्रतियोगिता अन्तर्गत समूह बीको तेस्रो खेलमा सुदूरपश्चिम प्रदेशविरुद्ध प्रदेश १ विजयी भएको छ। ५४ रनको विजयी लक्ष्य पछ्याएको प्रदेश १ ले १५.१ ओभरमा ५ विकेट गुमाउँदै लक्ष्य भेट्टाएको हो।
प्रदेश–१ लाई जीत दिलाउन कप्तान रुविना क्षेत्रीले सर्वाधिक १२ रनको योगदान दिइन्। निग्मा तामाङले ७ रन बनाइन्। सुदूरपश्चिमको बलिङमा दीपा जोराले २ विकेट, कविता कुँवर र कविता जोशीले समान एक–एक विकेट लिए।
त्यसअघि टस जितेर पहिले ब्याटिङ गरेको सुदूरपश्चिमले निर्धारित १६ ओभरमा ८ विकेट गुमाउँदै ५३ रन बनाएको थियो। सुदूरपश्चिमको ब्याटिङमा कविता जोसिले सर्वाधिक १४ रन बनाइन्। रेवती धामीले ८ रन, डोली भट्टले ५ रनको योगदान दिइन्।
प्रदेश–१ को बलिङतर्फसंगीता राईले ३ विकेट र सवनम राईले २ विकेट लिइन्। त्यस्तै कप्तान रुविना क्षेत्री र निग्मा तामाङले समान एक–एक विकेट लिए।
खेलमा जीत हासिल गरेसँगै प्रदेश–१ ले सेमिफाइनल यात्रा बलियो बनाएको छ। बुधबार हुने अर्काे खेलमा गण्डकी प्रदेश र बागमती प्रदेश भिड्दैछन्।
