अष्ट्रेलियामा जारी बिग बास लिग (बीबीएल) क्रिकेटमा नेपाली लेग स्पिनर सन्दीप लामिछाने आबद्ध होबार्ट हुरिकेन्स् मेलबर्न स्टार्ससँग पराजित भएको छ। सोमबार भएको खेलमा स्टार्ससँग होबार्ट १० रनले पराजित भएको हो।
१ सय ८४ रनको विजयी विजयी लक्ष्य पछ्याएको होबार्टले निर्धारित २० ओभरमा विकेट गुमाउँदै १ सय ७३ रन मात्र बनायो। होबार्टको लागि बेन म्याकडर्मोटले सर्वाधिक ९१ रन बनाए। ५८ बलको सामना गरेका उनले ८ चौका र ५ छक्का प्रहार गरे। त्यस्तै, डेविड मलानले २६ रन, पेटर ह्याण्डस्कोम्बले २९, कोलिन इन्ग्रामले १७ रनको योगदान दिए।
मेलबर्नको बलिङमा शाम रेनबर्डले २ विकेट, बिली स्ट्यानलेक, आडम जम्पा, लायम ह्याट्चरले समान एक एक विकेट लिए।
त्यसअघि पहिले ब्याटिङ गरेको मेलबर्नले निर्धारित २० ओभर ६ विकेट गुमाउँदै १ सय ८३ रन बनाएको थियो। मेलबर्नको लागि मार्कस स्टोइनिसले अविजित ९७ रन बनाए। ५५ बलको सामना गरेका स्टोइनिसले ७ चौका र ७ छक्का प्रहार गरेका थिए। त्यस्तै, हिल्टोन कार्टराइटले ३६, निकोलास पूरनले २६ रनको योगदान दिए।
होबार्टको बलिङमा नाथान इलिसले ३ विकेट लिँदा रिले मेरेडिथले २ र सन्दीप लामिछानेले एक विकेट लिए।
