सर्लाहीमा मोटरसाइकलको ठक्करबाट हरिणको मृत्यु भएको छ। बाग्मती नगरपालिका ३ स्थित नयाँरोड–बरहथवा सडक खण्डमा सोमबार राती मोटरसाइकलले ठक्कर दिँदा हरिणको घटनास्थलमै मृत्यु भएको हो।
उत्तरबाट दक्षिणतर्फ जाँदै गरेको प्रदेश १–०२–०४२ प.४००९ नम्बरको मोटरसाइकलले हरिणलाई ठक्कर दिएको हो। ठक्कर दिएपछि मोटरसाइकल पल्टिँदा चालक र पछाडि सवार दुवै जना घाइते भएका छन्।
चालक सप्तरीको कन्चनरुप नगरपालिका–११ बस्ने २२ वर्षीय सुनिल थापा र पछाडि सवार सर्लाहीको हरिपुर नगरपालिका–१ बस्ने २५ वर्षीय शिव कुमार महतो सामान्य घाईते भएका हुन्।
दुबैको हनुमन्ते अस्पताल बरहथवामा उपचार भइरहेको प्रहरीले जानकारी दिएको छ। यसअघि गत शनिबार कारको ठक्करबाट बाराको पथलैया–अमलेखगञ्ज सडकको आधाभार जंगलमा वयस्क पाटेबाघको मृत्यु भएको थियो।
