बारामा १ सय २ किलो गाँजा र भरुवा बन्दुकसहित तस्कर पक्राउ परेको छ। बाराको निजगढ नगरपालिका– १३ भक्तलाल खोलाको बगरमा शनिबार राति पौने १० बजे उनी पक्राउ परेका हुन्।
पक्राउ पर्नेमा मकवानपुर हेटौंडा उपमहानगरपालिका–६ बस्ने ४७ वर्षीय इमानसिंह तामाङ रहेका छन्। त्यसैक्रममा गाँजा तस्कर र प्रहरीबीच गोली हानाहान भएको थियो। ८/१० जनाको समूहमा रहेका लागुऔषध तस्करहरुले प्रहरीलाई देख्ने वित्तिकै गोली फायर गरेको थियो।
प्रतिकारमा प्रहरी टोलीले चाइनिज पेस्तोलबाट ५ राउन्ड हवाई फायर गरेको बताइएको छ। तामाङको साथबाट १ थान भरुवा बन्दुकसमेत बरामद भएको प्रहरीले जानकारी दिएकाे छ। घटनास्थलबाट ५ वटा सेतो बोराभित्र लुकाइ राखेको १ सय २ किलो अवैध लागुऔषध गाँजा पनि बरामद भएको छ।
