नेपाली क्रिकेट जगतका ‘उदीयमान’ क्रिकेटर कुन्दन सिंहको निधन भएको छ। मिर्गौलाकाे गम्भीर समस्यासँग लडिरहेका सिंहको २५ वर्षको उमेरमा आइतबार बिहान निधन भएको हो।
उनको महोत्तरीको जलेश्वर–९ फुल्हटा घरमै निधन भएको हो। उनी प्रदेश २ क्रिकेट टिमका ओपनर ब्याट्सम्यान थिए। मिर्गौला प्रत्यारोपण गर्नुपर्ने अवस्थामा पुगेका सिंहको डायलसिस गरिँदै आइएको थियो।
क्रिकेट एसोसिएसन अफ नेपालले सिंहको निधनबाट स्तब्ध भएको जनाउँदै श्रद्धाञ्जली अर्पण गरेको छ। अभ्यासकै क्रममा मिर्गौलामा समस्या देखिएपछि एक वर्षयता उनी नियमित डायलसिसमा थिए।
राष्ट्रिय स्तरको क्रिकेट प्रतियोगितामा उनले चारपल्ट यू–१६, तीनपल्ट यू–१९ र तीनपल्ट खुला प्रतिस्पर्धामा आफ्नो प्रदर्शन देखाएका थिए। दोस्रो प्रधानमन्त्री कप सकेपछि एकेडेमी भर्ना भएका उनी अभ्यासका क्रममा बिरामी भएका थिए।
