प्रधानमन्त्री केपी शर्मा ओली आफ्ना विरोधीहरूलाई कटु बचन प्रहार गर्न कहिल्यै पछि पर्दैनन्। आफ्ना अभिव्यक्तिबाट अनेक चर्चा र आलोचना कमाउने ओलीको राष्ट्रियसभाको आइतबारको बैठकको एक क्रियाकपाल पुनः विवादमा परेको छ।
संसदीय गरिमा र मर्यादा परिपालना नगरी ओलीले रोस्टममै थुकेका कारण उनको आलोचना शुरु भएको हो। रोस्टममा मात्रै होइन, ओलीले सम्बोधन गरिसकेपछि नेपाली कांग्रेस नेतृ एवं राष्ट्रियसभा सदस्य अनिता देवकोटाले प्रतिप्रश्न गर्दैगर्दा पनि ‘थु–थु’ गर्नमै व्यस्त थिए।
यसअघि, लामो सम्बोधनका क्रममा ओलीले परराष्ट्रमन्त्री प्रदीपकुमार ज्ञवालीको भारत भ्रमणबारे भनाई राख्ने क्रममा पनि रोस्टमको भित्रतर्फ थु–थु गरे।
नेतृ देवकोटाले संसदीय मर्यादा विपरीतको ओलीको उक्त कार्यमा नियमापत्ति व्यक्त गर्न सकिने बताइन्। यद्यपि, ओलीले थुके पनि कुनै सदस्यले आपत्ति प्रकट गरेनन्। ओलीले थु–थु गर्दैगर्दा राष्ट्रियसभाका अध्यक्ष गणेशप्रसाद तिमिल्सिना मुसुक्क हाँसे मात्रै। केही प्रतिक्रिया गरेनन्।
संसद् बैठक चलिरहेका बेला अवाञ्छित गतिविधि गर्न निषेध गरिएको छ। पटक–पटक सांसद्, मन्त्रीदेखि २ पटक प्रधानमन्त्री भइसकेका ओली यो विषयमा जानकार नै छन्। तर, राष्ट्रियसभाको गरिमा बिर्सिएर ओलीले थु–थु गरेको दृष्य पक्कै शोभनीय थिएन।
राष्ट्रियसभाको लाइभबाट पनि उक्त दृष्य हटाइएको छैन। यसअघि ओलीले बैठकमा बोल्दै ओलीले चुनावमा आएर आफूसँग प्रतिस्पर्धा गरेर बहुमत ल्याउन नेकपा अध्यक्ष पुष्पकमल दाहाल प्रचण्ड र माधवकुमार नेपाल पक्षलाई चुनौती दिएका छन्। ओलीले प्रचण्ड र नेपाल पक्ष चुनावमा जाने डराएको आरोप लगाए।
‘जनताका बिचमा जाने भन्ने बित्तिकै, निर्वाचन भन्ने बित्तिकै सातो किन गएको?,’ अन्त कही जाने भनेको होइन नि, अरु कुनै प्रभुका चरणमा जाने भनेको होइन नि, जनताका शरणमा जाने भनेको, नेपाली जनताको अभिमत लिने भनेको,’ ओलीले भने।
ओलीले आफूले गल्ती गरेको भए जनताले दण्डित गर्ने धारणा राखे। ‘केपी ओलीले गल्ती गरेको रहेछ भने नेपाली जनताले त्यसको दण्ड देलान्, जनताका बीचमा गएर केपी ओलीलाई दण्ड दिन अपील गर्नुस् न, जानुस्, तपाईहरूलाई त्यहीँ जवाफ दिएर पठाउने छन्,’ ओलीले भने।
